VOLEJBOLL MESHKUJ / Partizani fiton Ligën Gjergj Kastrioti, të kuqtë shkatërrojnë Tiranën në finale
Partizani është fitues i edicionit të tretë të Ligës Gjergj Kastrioti në volejboll për meshkuj. Të kuqtë e Ylli Tomorrit zhvilluan një paraqitje fantastike në finale, duke çmontuar Tiranën me rezultatin 3-0.
Derbi i kompeticionit mbarëkombëtar, i zhvilluar sot në Korçë, foli tërësisht për të kuqtë, të cilët u treguan superiorë, duke dominuar ndaj rivalëve bardheblu. Një Partizan që komandoi në të tria setet për t’i mbyllur llogaritë me rezultatin e pastër 3-0 (25-21, 25-18, 25-22) në harkun kohor të 90 minutave.
Me një bosht solid lojtarësh të talentuar vendorë dhe me 4 brazilianë të harmonizuar më së miri me grupin, trajneri Tomorri ka ndërtuar një ekip që funksionon në perfeksion, duke merituar plotësisht trofeun e parë në Ligën Gjergj Kastrioti, ndërsa lojtari MVP i finales u shpall braziliani Coutinho, autor i 20 pikëve në finale.
Ndërkohë, kapiteni legjendar Klodian Kasa, vijon të shkruajë rekorde mbi rekorde në aspektin individual, ku pas 19 titujve kampionë dhe 20 kupave, sot ngriti lart edhe trofeun e parë mbarëkombëtar të karrierës.
Kështu, Liga Gjegj Kastrioti uli siparin e një edicioni që kishte nisur me luhatje gjatë fazës së grupeve për ekipet e Shqipërisë, por faza finale tregoi edhe një herë se sporti i rrjetës këtu, mbetet përpara “Dardanëve”, me të tria triumfet që vijnë nga skuadrat shqiptare.
FAZA FINALE
REZULTATET
GJYSMËFINALET
2 MARS
TIRANA – FERIZAJ 3-1
PARTIZANI – PEJA 3-1
FINALJA
3 MARS
TIRANA – PARTIZANI 0-3
ARTIN LLESHAJ – PANORAMASPORT.AL
NDIQE LIVE "PANORAMA TV"