Shqipëria vijon të regjistrojë rezultate të shkëlqyera në arenën ndërkombëtare me sportin e mundjes, teksa suksesi më i fundit ka ardhur nga Kampionati Europian që po mbahet në Bukuresht. Islam Dudaev ka bërë sot paraqitje të jashtëzakonshme, duke koleksionuar katër fitore të njëpasnjëshme, për t’u kualifikuar në finalen e peshave 65 kg në stilin e lirë.

Mundësi rus, i natyralizuar me pasaportë shqiptare, u tregua fantastik në të gjitha duelet e tij. Dudaev e nisi konkurrimin me fitoren 6-3 ndaj turkut Abdullah Toprak në kualifikuese. Më tej ai triumfoi me rezultatin 8-1 ndaj rumunit Stefan Ionut Coman, duke kaluar në çerekfinale, aty ku gjeti përballë francezin Khamzat Arsam Erzouev, të cilin e mposhti 4-0, duke hipotekuar kalimin për në gjysmëfinale. Dudaev e vijoi serinë e ndeshjeve të shkëlqyere edhe në katërshe, teksa kaloi me sukses me rezultatin 3-1 azerin Ali Rahimzada, duke prerë biletën që të çon në finalen e madhe, aty ku nesër rreth orës 17:30 do të matë forcat me rusin Gadzhimurad Rashidov.

Dudaev tashmë e ka të sigurt medaljen e argjendit, por kampioni kuqezi do të japë gjithçka për të bërë të tijën të artën. Kujtojmë që edhe dy vite më parë në Europianin e zhvilluar në Budapest, Islam Dudaev i ka dhuruar Shqipërisë medalje bronzi, ndërsa strategjia e FSHM-së për të afruar sportistët rusë në Kombëtare ka dhënë rezultate të menjëhershme dhe historike, siç ishte edhe titulli kampion bote i fituar nga Zelimkhan Abakarov.

Ky i fundit do të garojë nesër në Kampionatin Europian në kategorinë e peshave 61 kg në stilin e lirë, teksa në duelin e parë do të ketë përballë armenin Mezhlum Mezhlumyan. Ashtu sikurse e konfirmoi edhe vetë presidenti i Federatës Shqiptare të Mundjes, Sahit Prizreni, pritshmëritë janë të lartë edhe për Abakarovin, me të cilin synohet minimalisht zona e medaljeve. .

ARTIN LLESHAJ – PANORAMASPORT.AL

NDIQE LIVE "PANORAMA TV"

---