Në nderim dhe përkujtim të një figure të shquar si Muhamet Malo, në datat 12-15 maj, Tirana priti aktivitetin ndërkombëtar të mundjes. Edicioni i dytë i turneut “Muhamet Malo” kishte pjesëmarrje edhe më të gjerë, teksa pa të zbrisnin në tapet 92 mundës nga shtete si Shqipëria, Kosova, Maqedonia e Veriut, Italia, Britania, Azerbajxhani, Britania, Rumania apo Malta, të cilët garuan në stilin greko-roman dhe atë të lirë.

Eventi i organizuar nga Federata Shqiptare e Mundjes në bashkëpunim me djalin e të ndjerit Muhamet Malo, Klajdi, i cili është president nderi në FSHM, dhuroi duele interesante dhe me shumë rivalitet, duke i argëtuar të pranishmit që i ndoqën nga afër në sallën “Feti Borova”. Dita e parë u përkiste mundësve të stilit greko-roman, teksa çdo skuadër mori pjesë me sportistë në peshat përkatëse. Kampione në rang ekipor në këtë stil u shpall Italia me 180 pikë, ndjekur nga Bullgaria me 170 pikë, ndërsa Shqipëria plotësoi podiumin, duke u klasifikuar në vend të tretë në kuotën e 147 pikëve.

Sportisti më i mirë i stilit greko-roman u shpall bullgari Aik Mnatsakanian, i cili konkurroi në kategorinë e peshave 77 kg. Më tej ishte radha e dueleve në stilin e lirë, disiplinë që u dominua nga Shqipëria. Kuqezinjtë e mundjes së lirë koleksionuan 175 pikë në rang ekipor, duke zënë vendin e parë. Vendi i dytë shkoi për Italinë me 125 pikë, ndërsa e treta u rendit Britania e Madhe me 70 pikë.

Titulli i sportistit më të mirë u fitua nga Zelimkhan Abakarov i peshës 65 kg, i cili garon për flamurin shqiptar. Gjithashtu, shkëlqyen edhe mundësit e tjerë kuqezinj si Islam Dudaev, Elmaz Kryeziu, Osman Hajdari dhe Emiljano Onuzi, të cilët u shpallën kampionë në peshat e tyre.

Gjatë ceremonisë se aktivitetit, presidenti i FSHM-së, Sahit Prizreni, përshëndeti të gjithë pjesëmarrësit e pranishëm. Më pas, Klajdi Malo, duke u uruar suksese sportistëve, falënderoi të gjithë ata të cilët bënë të mundur këtë aktivitet dhe premtoi se do ta çojë përpara nismën e babait të tij. Kështu, mundja shqiptare dhe ndërkombëtare vijon të nderojë një prej figurave më të shquara dhe kontribuuesve më të mëdhenj të këtij sporti, Muhamet Malo.

PANORAMASPORT.AL

NDIQE LIVE "PANORAMA TV"

---