Konkursi shahistik, shpallen kampionët e shkollave 9-vjeçare
Është zhvilluar në Tiranë, në mjediset Ambasadës Hungareze, konkursi shahistik me nxënës të shkollave 9-vjecare të kryeqytetit. Një aktivitet i organizuar nga Ambasada Hungareze në bashkëpunim me Federatën Shqiptare të shahut.
Një organizim model, në realizimin e kësaj veprimtarie 1-ditore me parametra europiane. Një shfaqje e madhe e përgatitur në detaje, që nga fillimi e deri në përfundim, duke e kthyer eventin një festë e bukur dhe me vlera të padiskutueshme për këtë sport. Konkursi përbënte një test teoriko-praktik, të ndarë veçmas, duke filluar nga klasa e parë e deri te klasa e nëntë.
Nga 46 pjesëmarrës, pati 9 fitues për çdo kategori, ndërsa testimi zgjati 1 orë e 30 minuta. Në fund u mbajt edhe ceremonia e vlerësimit për fituesit, teksa Kupat, medaljet, certifikatat dhe librat e shahut të dhuruara nga Federata e Shahut të Hungarisë, u shpërndanë nga ambasadori Adam Lovassy, si edhe dhe zv.Ministri i Arsimit dhe Sporteve, Endri Hoxha.
Në vlerësimin e përgjithshëm, 3 më të mirët e konkursit u shpallën Mia Çaku për klasat 1- 3, Zaharia Koxhioni për klasat 4-6 dhe Matteo Guralumi për klasat 7-9. Pas më shumë se dy dekadash mungesë organizimi të konkurseve të tilla shahistike, ambasada hungareze i ka bërë dhuratën më të bukur shahistëve te rinj, të cilëve realisht u mungojnë shfaqje të tilla argëtuese, të dobishme e plot vlera.
Nga shkolla e famshme hungareze ke çfarë të mësosh, pasi tradita dhe arritjet tregojnë se motrat e famshme Polgar apo “Portishi i Madh” mbeten një model frymëzimi.
KRISTAQ ANDONI – PANORAMASPORT.AL
NDIQE LIVE "PANORAMA TV"