Juriç dëmtohet sërish, ja si pritet të luajnë shkodranët ndaj Laçit
Vllaznia do të ketë një mungesë të rëndësishme në përballjen ndaj Laçit, pikërisht qendërmbrojtësin kroat Marko Juriç.
Pavarësisht se ai është stërvitur rregullisht me ekipin, dje trajneri Memelli është shprehur se Juriç, për shkak të një kontraktimi, nuk do të jetë pjesë e ekipit ndaj Laçit. Sipas të gjitha gjasave, zëvendësuesi i kroatit në qendër të mbrojtjes do të jetë 21-vjeçari Gledjan Pusi.
Mirëpo, në krahasim me ndeshjen e fundit ndaj Partizanit, ndryshimet në formacion do të jenë të paktën dy, duke filluar me krahun e djathtë të mbrojtjes, aty ku Redon Dragoshi do të ulet në stol dhe Geralb Smajli do të rikthehet titullar. Me dyshen Pusi-Stojanoviç në qendër, reparti i mbrojtjes kompletohet me Hakajn në të majtë. Në mesfushë do të rreshtohen përpara mbrojtjes Ardit Krymi dhe Lorik Boshnjaku, ndërsa gjasat janë që të përdoret skema 4-2-3-1. I spostuar në mesfushë për të bërë rolin e një fantazisti do të jetë Esat Mala.
Sa i përket krahëve të ofensivës, ka një balotazh mes Mehdi Çobës dhe Darko Dodevit. Shanse më të mëdha për të qenë nga minuta e parë i ka shkodrani, por gjithçka do të vendoset vetëm pak minuta para sfidës, pasi Memelli kërkon një sulmues krahu që të sakrifikojë edhe në fazën defensive. Në krahun e majtë të sulmit pritet të jetë Ildi Gruda, ndërsa në majë në rolin e pykës si zakonisht Bekim Balaj.
A.URUÇI-PANORAMASPORT.AL
NDIQE LIVE "PANORAMA TV"