Në Egjipt po mbahet Kupa e Botës në qitje sportive, aktivitet madhor ku merr pjesë edhe Shqipëria.

Delegacioni Kuqezi në Botërorin e Qitjes

Kombëtarja kuqezi përfaqësohet me sportistet Kristina Anxhara, Gresia Balli, të cilat janë dërguar me shpenzimet e federatës, ndërsa gjithashtu pjesë e ekipit janë edhe Manuela Delilaj dhe Manjola Konini, qitëse të cilat kanë udhëtuar me shpenzimet e tyre personale.

Por ajo që bie në sy në këtë aktivitet është se Shqipëria paraqitet pa trajner.

Pjesë e delegacionit janë qitëset dhe sekretarja e FSHQS-së, Enkeleda Çaushi, e cila është gjithashtu anëtare e Komitetit Ekzekutiv në KOKSH, ndërsa mungon trajnerja Diana Mata, e cila pritet t’i bashkohet ekipit në ditët në vijim bashkë me qitësin e ri, Ilian Lati.

Një zgjedhje që duket se ka ardhur për shkaqe financiare, por është paradoksale, se si një ekip mund të futet pa trajner në kompeticione të tilla.

Ndërkohë ditën e djeshme për Shqipërinë ka garuar Kristina Anxhara, e cila përveç se sportiste është edhe pjesë e administratës së Komitetit Olimpik Kombëtar Shqiptar.

Anxhara konkurroi në disiplinën 10 metra pushkë me ajër.

Ajo regjistroi 612.7 pikë, duke u renditur e 65-ta mes 68 rivaleve në baterinë e saj, ndërsa në klasifikimin e përgjithshëm u renditi në vend të 122-të mes 135 konkurrueseve.

Një rezultat shumë i dobët, që tregon edhe një herë se sa larg lavdisë së dikurshme është qitja shqiptare.

Vitet e fundit Shqipëria e qitjes është e “abonuar” rregullisht me vendet e fundit në kompeticionit e rëndësishme ndërkombëtare të këtij sporti.

ARTIN LLESHAJ – PANORAMASPORT.AL

NDIQE LIVE "PANORAMA TV"

---