Video/ Dy vjeçarja bie nga ballkoni i katit të 12-të, shpëtohet mrekullisht nga një postier!

Një postier në Vietnam i shpëtoi jetën një vajze të vogël, e cila ra nga kati i 12-të i një pallati në Hanoi, raporton “The Independent”.

Nguyen Ngoc Manh pa një vajzë 2-vjeçare të varur në ballkon kur mbërriti në Hanoi me një pako për një nga banorët në atë lagje.

“Unë isha ulur në makinë dhe po prisja të dorëzoja disa sende për një klient në ndërtesën përballë ndërsa dëgjoja zhurmën e një foshnjeje, thjesht mendova se nëna e saj po i bërtiste“,- tha Z. Manh.

“Sidoqoftë, shumë shpejt dëgjova dikë që bërtiste për ndihmë dhe nxora kokën nga makina, duke parë përreth dhe vura re një vajzë që ishte varur nga ballkoni.

Unë dola menjëherë nga makina dhe gjeta një mënyrë për t’u ngjitur në ndërtesën afër. U ngjita në një çati me pllaka të larta 2 metra për të marrë një pozicion të përshtatshëm për të pritur vajzën,”- shtoi ai.

Megjithëse Z. Manh e pozicionoi veten për të kapur foshnjën dhe për ta parandaluar atë që të binte përtokë, ai thotë se ishte e rastësishme që ajo të binte në prehrin e tij.

“Unë u përpoqa të zgjas dorën time dhe bëra përpjekjet maksimale për të kapur vajzën, në mënyrë që kur foshnja të binte, të mos e lejoja të binte në tokë. Për fat të mirë, foshnja ra në prehrin tim”,- tha ai.

Më vonë, në një intervistë për “VN Express”, Z. Manh tha: “Gjithçka ndodhi brenda një minute. Unë nuk e kuptova se si mund ta ngjisja çatinë kaq shpejt. Nuk mund të besoja se i shpëtova jetën vajzës“.

Por tmerri nuk mbaroi këtu. Ndërsa Z. Manh kapi foshnjën, ai tha se dalloi gjak që pikonte nga goja e saj. Menjëherë e çoi në një spital aty pranë.

Vajza, sipas raportit, ka një krah dhe një këmbë të thyer, por është në gjendje të qëndrueshme.

“Nuk ka ndryshuar vetëm jetën time. Normalisht që postimet e mia në Facebook tërheqin vetëm disa përgjigje, tani kam dhjetëra mijëra të tilla,”- tha Z. Manh.

Megjithëse shumë përdorues të internetit e kanë quajtur atë një hero në mediat sociale, Manh tha se ai nuk e pëlqente këtë etiketim, duke besuar se dikush do të kishte bërë të njëjtën gjë duke pasur parasysh rrethanat.

“Unë nuk e shoh veten si një hero. Unë thjesht dua të bëj mirë,” – u shpreh ai teksa fliste për “VNExpress”.