MacKenzie Scott, ish-partnerja e themeluesit të “Amazon”, Jeff Bezos, ka dhuruar më shumë se 4 miliardë dollarë për 384 organizata në katër muajt e fundit.
Në një postim që bëri në blog-un e saj, Scott tha se dëshironte që t’i ndihmonte financiarisht të gjithë amerikanët që po luftonin me probleme të ndryshme për shkak të pandemisë, raporton “Republic World”.
“Humbjet ekonomike kanë qenë më të mëdha për gratë, për njerëzit me ngjyrë dhe për njerëzit që jetojnë në varfëri. Ndërkohë, janë rritur ndjeshëm pasurinë e miliarderëve”,- tha ajo.
Zonja Scott dhuroi 1.7 miliard dollarë për 116 organizata bamirësie në korrik, ndërsa shuma e fundit i çon donacionet e saj të përgjithshme për vitin, në gati 6 miliardë dollarë.
Donacionet u përqendruan tek personat që jetojnë në komunitete që përballen me mungesë ushqimi, masa të larta të pabarazisë racore, nivele të larta lokale të varfërisë dhe qasje të ulëta në kapital filantropik.
Në vitin 2019 ajo nënshkroi “Betimin e Dhënies”, duke premtuar të jepte pjesën më të madhe të pasurisë së saj. “Betimi i Dhënies” është një angazhim nga individët dhe familjet më të pasura të botës për t’ia kushtuar shumicën e pasurisë së tyre bamirësisë.
Scott është personi i 18-të më i pasur në botë dhe pasuria e saj u rrit me 23.6 miliardë dollarë vetëm këtë vit.
Pjesa më e madhe e pasurisë së saj vjen nga ish-bashkëshorti, Bezos, i cili është njeriu më i pasur në botë.
© Panoramaplus.al