Vala e fundit e të nxehtit që ka përfshirë vendin po ndikon jo vetëm në humorin dhe energjinë tonë, por edhe në sistemin tretës. Fryrje barku, gazra dhe shqetësime gastrointestinale janë ndër ankesat më të zakonshme që po raportojnë qytetarët gjatë këtyre ditëve përvëluese.
Sipas ekspertëve të shëndetit, temperaturat e larta ndikojnë drejtpërdrejt në sistemin tonë tretës. Ja përse: kur trupi ekspozohet ndaj të nxehtit, gjaku ridrejtohet nga organet e brendshme drejt lëkurës për të shpërndarë nxehtësinë, çka ngadalëson funksionin normal të stomakut dhe zorrëve. Për më tepër, nxehtësia favorizon shtimin e baktereve të dëmshme në zorrë, duke rritur rrezikun e infeksioneve dhe simptomave si diarre apo fryrje.
Çfarë mund të bëni për ta përballuar më mirë situatën? Ja disa këshilla të thjeshta por efektive:
Pini më shumë ujë – Synoni të paktën 2 litra në ditë për të parandaluar dehidratimin dhe për të ndihmuar tretjen.
Mos shmangni ushqimet e gatuara – Ushqimet e ftohta mund ta ngadalësojnë tretjen. Perimet e ziera janë më të lehta për stomakun.
Hani vakte të vogla dhe të shpeshta – Ndihmon në shmangien e mbingarkesës së stomakut dhe ruan energjinë gjatë ditës.
Shmangni pijet e gazuara dhe alkoolike – Ato rrisin fryrjen dhe ndikojnë negativisht në funksionin e zorrëve.
Zgjidhni ushqime të freskëta dhe të lehta – Frutat dhe perimet janë ideale për të mbajtur trupin të hidratuar dhe të lehtë për tretje.
Mos harroni të lëvizni – Edhe një shëtitje e shkurtër ndihmon në stimulimin e zorrëve.
Flini mirë – Mungesa e gjumit ndikon në sistemin tretës dhe në zgjedhjet ushqimore, duke shtuar problemet me stomakun.
Të gjithë e duam verën, por kujdesi për shëndetin nuk duhet lënë pas dore. Për të përballuar më lehtë këtë periudhë të nxehti, është e rëndësishme të dëgjojmë trupin dhe t’i përgjigjemi nevojave të tij – duke filluar nga një gotë ujë e freskët deri te një pjatë me perime të gatuara lehtë.
© Panoramaplus.al