Sarah Jessica Parker është rikthyer fuqishëm në vëmendje me vazhdimin e serialit kult “Sex and the City” – “And Just Like That”, por këtë herë jo për veshjet apo rolin ikonik të Carrie Bradshaw, por për një vendim personal që ka mbajtur që në fillim të karrierës: refuzimin për të shfaqur skena lakuriqësie në ekran.
Ndonëse bashkë-yjet e saj, Cynthia Nixon dhe Kristin Davis, kanë pranuar të xhirojnë skena të tilla si në serialin origjinal ashtu edhe në versionin e ri, Parker ka qëndruar gjithmonë e palëkundur në vendimin e saj, dhe për këtë ka pasur gjithmonë mbështetjen e krijuesit të serialit, Darren Star.
Në një intervistë të fundit për SiriusXM me Howard Stern, ajo kujtoi bisedën e parë me Darren përpara se të pranonte rolin:
“I thashë që skenari ishte shumë interesant, por isha e shqetësuar për pjesët me lakuriqësi. Ai m’u përgjigj: ‘Atëherë mos e bëj. Nuk më intereson. Nëse të tjerët ndihen rehat, le ta bëjnë, por ti nuk ke pse.’”
Parker theksoi se vendimi i saj nuk kishte lidhje me ndonjë ide morale apo pasiguri për pamjen fizike, por thjesht me një ndjenjë personale:
“Nuk më dukej e drejtë për veten time. I admiroj gratë që e bëjnë, por unë vetë jam e turpshme. Nuk ndihesha kurrë rehat.”
Aktorja zbuloi gjithashtu se gjatë një incidenti në xhirime, ku i ishte kërkuar të shfaqej nudo, kishte shpërthyer në lot:
“Thashë vetëm, ‘Nuk do ta bëj.’ Ishte një moment i vështirë për mua.”
Përveç refuzimit të lakuriqësisë, Parker ka qenë po aq e kujdesshme edhe me fjalorin që përdorte personazhi i saj. Ajo ka kërkuar që Carrie, si shkrimtare, të fliste me mendim dhe qëllim, duke shmangur gjuhën e panevojshme:
“Nëse do përdorësh fjalë të forta, le të kenë kuptim dhe ndikim. Nuk jam kundër, por çdo gjë duhet të ketë arsyen e vet.”
© Panoramaplus.al
