Prezantuesja e njohur, Ellen DeGeneres, rezulton pozitive për Covid-19. Ja gjendja e saj shëndetësore

Ellen DeGeneres njoftoi të enjten se ka dalë pozitive për Covid-19.

Drejtuesja e emisionit të njohur “The Ellen DeGeneres Show”, e ndau lajmin me të gjithë nëpërmjet një postimi që bëri në llogarinë e saj në “Twitter”, raporton “CNN”.

“Përshëndetje të gjithëve”, shkroi DeGeneres. “Unë dua t’ju bëj të ditur të gjithëve se kam testuar pozitivisht për Covid-19. Për fat të mirë, tani ndihem mirë.

Kushdo që ka qenë në kontakt të ngushtë me mua është njoftuar dhe unë jam duke ndjekur të gjitha udhëzimet e duhura të ‘Qendrës së Kontrollit dhe Parandalimit të Sëmundjeve’. Do t’ju shoh përsëri të gjithëve pas pushimeve. Ju lutem qëndroni të shëndetshëm dhe të sigurt“, shkruante ajo.

“The Ellen DeGeneres Show” rifilloi xhirimet në shtator të këtij viti, duke pasur parasysh protokollet e sigurisë Covid.

Një zëdhënës për “Telepictures” i tha “CNN” se programi nuk do të transmetohet deri në janar. Gjatë kësaj periudhe do të ritransmetohen të gjitha episodet e xhiruara deri më tani.

DeGeneres ka mirëpritur të ftuar fizikisht në studio, si dhe virtualisht. Publiku i saj e ndiqte nga televizioni, deri në muajin tetor, kur u lejua një numër i kufizuar i tyre që të shkonin fizikisht në shfaqje.