Romeo Beckham, djali i dytë i David dhe Victoria Beckham, është parë së fundmi në shoqërinë e modeles dhe influencueses gjermane Caroline Daur, vetëm pak javë pas ndarjes së tij nga DJ Kim Turnbull.
22-vjeçari u fotografua të shtunën në mbrëmje në Paris, duke u larguar nga një festë e mbajtur në hotelin luksoz Costes, së bashku me Caroline dhe disa shoqe të tjera. Më pas, grupi vazhdoi festimet në klubin e njohur të natës Julia, duke qëndruar atje deri në orët e para të mëngjesit.
Sipas gazetës britanike The Mail, burime pranë çiftit kanë theksuar se Romeo dhe Kim u ndanë pas shtatë muajsh lidhjeje, vetëm tre javë pas festës së ditëlindjes së 50-të të David Beckham. Miqtë e afërt deklaruan se marrëdhënia e tyre “u shua në mënyrë natyrale”, ndërsa theksuan se ndarja ka qenë miqësore dhe pa drama.
Dalja në Paris, megjithëse e paraqitur si një darkë e rastësishme mes miqsh, ka nxitur spekulime për një lidhje të mundshme mes Romeos dhe Caroline-s, e cila është një nga figurat më të njohura në rrjetet sociale dhe botën e modës. Burime të afërta thanë për MailOnline se Caroline iu bashkua grupit përmes një mikeshë të përbashkët, dhe se mbrëmja ishte organizuar për qëllime shoqërore dhe pune, duke përfshirë edhe pjesëmarrjen e Romeos në turneun e Roland Garros.
Përpjekjet e dyshes për të shmangur fotografët nuk kaluan pa u vënë re. Romeo dhe Caroline u larguan veçmas nga vendi i ngjarjes, por u panë më pas duke hipur në të njëjtën makinë së bashku me Dan Sablon, drejtorin e kulturës së Vogue France, i cili kohët e fundit ka stiluar Romeo për një histori mode në këtë revistë prestigjioze.
Në këtë dalje publike, Romeo zgjodhi një veshje sportive me pulovër të zezë dhe atlete blu, ndërsa Caroline tërhoqi vëmendjen me një fustan të zi elegant dhe çizme deri në gju.
Thuhet se Romeo dhe Caroline janë lidhur nga pasioni i përbashkët për tenisin, pasi të dy kanë marrë pjesë në gjysmëfinalet e meshkujve në French Open vetëm një ditë para daljes së përbashkët në Paris.
Përfaqësuesit e të dyve ende nuk kanë dhënë një koment zyrtar për marrëdhënien e tyre. Ndërkohë, miqtë e afërt të Romeos konfirmojnë se marrëdhënia me Kim Turnbull ka përfunduar në mënyrë paqësore dhe nuk lidhet me tensionet familjare që thuhet se kanë përfshirë familjen Beckham në muajt e fundit.
© Panoramaplus.al