Intervista e bujshme e Princeshës Diana në BBC me Martin Bashir në vitin 1995 tronditi Mbretërinë e Bashkuar dhe jo vetëm.
Fraza e cila nuk do të harrohet asnjëherë ishte: “Ishim tre në këtë martesë”, ku Diana aludonte për marrëdhënien e Charles me mbretëreshën e tanishme Camilla.
Momenti kryesor erdhi kur Mbretëresha dërgoi një letër ku kërkonte në mënyrë të vendosur divorcin e tyre. Duke u konsultuar me kryeministrin John Major dhe Kryepeshkopin e Canterbury George Carey, letra e Mbretëreshës thoshte: “Jam konsultuar me Kryepeshkopin e Canterbury-t dhe me kryeministrin dhe, natyrisht, me Charles, dhe ne kemi vendosur që rruga më e mirë për ju është divorci”.
Kjo gjë ngjalli zemërimin e Dianës, pasi ajo u ndje e detyruar për një divorc që nuk e kërkoi. Ditë më vonë, Buckingham Palace zyrtarizoi divorcin, duke shprehur këndvështrimin e Mbretëreshës, të mbështetur nga Duka i Edinburgut, se një divorc i shpejtë ishte i dëshirueshëm duke pasur parasysh rrethanat mbizotëruese.
Më 28 gusht 1996, ky kapitull u mbyll, duke shënuar fundin e martesës mbretërore. Diana mori një shumë të përgjithshme prej 17 milionë paundësh së bashku me 350,000 £ vjetore për zyrën e saj private, dhe ajo mbajti rezidencën e saj në Pallatin Kensington.
Asaj iu hoq titulli i Lartësisë së Saj Mbretërore dhe nga ai moment ajo do të njihej si ‘Diana, Princesha e Uellsit’.
Fatkeqësisht, jeta e saj pati një fund tragjik pas një aksident automobilistik në Paris më 31 gusht 1997, vetëm një vit pas divorcit, së bashku me partnerin e saj Dodi Fayed.
