Pas muajsh spekulimesh dhe thashetheme në media, Katy Perry dhe Orlando Bloom janë ndarë përfundimisht. Përfaqësuesit e tyre konfirmuan zyrtarisht për Page Six se çifti ka qenë i ndarë që në fillim të vitit, duke theksuar se prioriteti i tyre mbetet rritja me dashuri dhe stabilitet e vajzës së tyre, Daisy.
“Orlando dhe Katy kanë qenë duke e rregulluar marrëdhënien e tyre për shumë muaj, duke u përqendruar në kujdestarinë e përbashkët. Ata do të vazhdojnë të shfaqen së bashku si familje, pasi përparësia e tyre e përbashkët është dhe gjithmonë do të jetë rritja e vajzës së tyre,” thuhet në deklaratën zyrtare.
Sipas burimeve të afërta me çiftin, ndarja kishte ndodhur shumë kohë përpara se të bëhej publike. Një burim për Page Six tha:
“Ka mbaruar. Ata po presin që turneu i Katy-t të përfundojë përpara se të njoftojnë ndarjen e tyre.”
Këngëtarja e hitit Firework është aktualisht në turneun e saj “Lifetimes”, i cili nisi më 23 prill dhe do të zgjasë deri më 7 dhjetor.
Ndërkohë, Orlando Bloom është parë duke shijuar jetën e tij si beqar, sidomos gjatë qëndrimit të tij në Miami në muajin prill, ku sipas burimeve, ai është parë duke flirtuar hapur me vajza. Aktori ndodhej në Florida për lançimin e një anije turistike të MSC dhe më pas mori pjesë në Çmimin e Madh të Miamit, ku u shfaq pranë personazheve si Timothée Chalamet dhe Tom Brady.
Perry dhe Bloom u njohën në një festë pas ceremonisë së ndarjes së Golden Globes në vitin 2016. U fejuan në Ditën e Shën Valentinit në vitin 2019 dhe mirëpritën vajzën e tyre, Daisy Dove Bloom, më 26 gusht 2020.
Edhe pse historia e tyre dashurore tashmë ka përfunduar, të dy kanë shprehur përkushtimin për të qenë prindër të përbashkët dhe të pranishëm për vajzën e tyre.
© Panoramaplus.al