Filantropisti dhe manjati i teknologjisë Bill Gates, i cili ka investuar miliarda dollarë në përballimin e krizës klimatike, duket se po e ripërcakton qëndrimin e tij mbi rreziqet e ngrohjes globale, duke argumentuar se alarmimi i tepërt po e shpërqendron vëmendjen nga prioritetet reale.
Sipas New York Times, në një memo të gjatë të botuar të martën, bashkëthemeluesi i Microsoft kërkoi të zbuste atë që e quajti “ton apokaliptik” me të cilin shpesh përshkruhen pasojat e ndryshimeve klimatike.
Në vend të kësaj, ai bëri thirrje për një theks më të madh në përmirësimin e kushteve të jetesës në vendet më të varfra.
“Ndërsa ndryshimet klimatike do të kenë pasoja serioze – veçanërisht për njerëzit në rajonet më të varfra – ato nuk do të çojnë në zhdukjen e njerëzimit”, tha ai. “Njerëzit do të jenë në gjendje të jetojnë dhe të lulëzojnë në shumicën e pjesëve të Tokës në të ardhmen e parashikueshme”.
Ndërhyrja, katër vjet pas botimit të librit të tij “Si të shmangni një katastrofë klimatike”, shënon një ndryshim të qartë në perspektivën e miliarderit mbi sfidat e ngrohjes globale. Memorandumi u publikua një javë para samitit të OKB-së për klimën (COP30) në Belém të Brazilit, në të cilin Gates nuk do të marrë pjesë.
Në vitet e fundit, ai ka financuar politika dhe teknologji të energjisë së pastër përmes fondit të investimeve Breakthrough Energy, të cilin e themeloi në vitin 2015. Kompania ka investuar në startup-e dhe projekte që synojnë uljen e emetimeve, ndërtimin e rezistencës së komuniteteve të varfra ndaj përmbytjeve, zjarreve dhe thatësirave, dhe zhvillimin e teknologjive inovative të energjisë së pastër.
Por në muajt e fundit, Breakthrough Energy ka zvogëluar në mënyrë drastike operacionet e saj, dhe Gates njoftoi plane në maj për të mbyllur gradualisht Fondacionin Gates, i cili kishte dhënë më shumë se 1.4 miliardë dollarë për të ndihmuar fermerët në vendet në zhvillim. Gates vazhdon të investojë në teknologjitë e energjisë së pastër dhe inovacionin bërthamor, siç është TerraPower, i cili kohët e fundit mori miratimin kritik federal për të zhvilluar një lloj të ri reaktori.
Në memon e tij, ai argumentoi se komuniteti global duhet të investojë më shumë në uljen e kostos së energjisë së pastër dhe në uljen e ndotjes në sektorët industrialë, bujqësorë dhe të transportit. Megjithatë, ai theksoi se një theks i tepruar në uljen e emetimeve në afat të shkurtër po i devijon burimet e vlefshme nga veprimet më efektive për të përmirësuar jetën e njerëzve në një botë më të ngrohtë.
Siç thekson media amerikane, analistët besojnë se Gates po përpiqet të ripozicionojë debatin për politikën klimatike në një kohë kur Shtetet e Bashkuara po përjetojnë polarizim të fortë politik.
Siç komentoi David Callahan, kryeredaktor i Inside Philanthropy, “ndoshta kjo është një përpjekje për t’u zhvendosur drejt qendrës për të shmangur shënjestrimin nga administrata Trump”.
© Panoramaplus.al