Aktorja e njohur Charlize Theron ka ndarë detaje të rënda nga një ngjarje që i ndryshoi jetën, kur në moshën 15-vjeçare përjetoi natën kur nëna e saj qëlloi për vdekje të atin, në rrethana të vetëmbrojtjes.
Në një intervistë për The New York Times, Theron foli për incidentin traumatik të vitit 1991, duke treguar se si e ka përballuar atë ngjarje gjatë viteve.
Sipas rrëfimit të saj, gjithçka nisi pas një mbrëmjeje kur ajo dhe nëna e saj ishin kthyer nga kinemaja dhe kishin ndaluar në shtëpinë e xhaxhait. Theron kujtoi se u nxitua për të shkuar në banjo dhe nuk përshëndeti të atin, gjë që më pas shkaktoi tension.
“Duhej urgjentisht të shkoja në banjo,” tha ajo, duke shpjeguar se ai reagoi ashpër ndaj mungesës së përshëndetjes. “Në Afrikën e Jugut është shumë e rëndësishme respekti ndaj të moshuarve. Ai e mori si mungesë respekti dhe u zemërua.”
Ajo shtoi se ndjeu menjëherë se situata mund të përshkallëzohej, ndaj i kërkoi nënës së saj ndihmë për të shmangur përballjen. “I thashë: kur të kthehet në shtëpi, thuaji që po fle,” tregoi aktorja.
Theron përshkroi më tej momentet e frikës që pasuan, kur i ati u kthye në gjendje të rënduar emocionale. “E dija që diçka e keqe do të ndodhte,” tha ajo, duke kujtuar se ai hyri me forcë në shtëpi dhe nisi të qëllonte drejt derës së mbyllur.
Ajo tregoi se nëna e saj mori armën në një kasafortë për t’u mbrojtur, ndërsa përpiqeshin të ndalonin hyrjen e tij. “Ne e mbanim derën me trupat tanë, sepse nuk kishte bravë,” u shpreh ajo.
Sipas rrëfimit të saj, i ati qëlloi disa herë nga dera, por plumbat nuk i prekën. Më pas situata u përshkallëzua më tej, dhe në përpjekje për të mbrojtur veten dhe vajzën e saj, nëna e saj qëlloi drejt tij.
Theron gjithashtu kujtoi se në incident u përfshi edhe xhaxhai i saj, i cili mbeti i plagosur pasi një plumb u rikoshetua dhe e goditi në krah.
Aktorja tha se për shumë vite ka ndjerë se ishte e vetmja që kishte kaluar një përvojë të tillë, duke theksuar rëndësinë e të folurit hapur për trauma të tilla. “Është e rëndësishme që njerëzit të mos ndihen vetëm,” u shpreh ajo.
Ajo shtoi se, pavarësisht traumës, nëna e saj zgjodhi të vazhdonte jetën normalisht pas ngjarjes. “Të nesërmen më dërgoi në shkollë si çdo ditë. Ishte si një mënyrë për të thënë: duhet të ecim përpara,” tha Theron.
Në të kaluarën, aktorja ka folur edhe për dhunën në familje dhe dhunën ndaj grave, duke e cilësuar atë si një problem global dhe të vazhdueshëm.
© Panoramaplus.al
