Princi William tregoi edhe një herë kujdesin dhe mbështetjen ndaj bashkëshortes së tij, Kate Middleton, gjatë angazhimit të tyre të fundit mbretëror në Skoci.
Momenti i veçantë u fotografua më 20 janar, kur Princi dhe Princesha e Uellsit vizituan studion dhe organizatën bamirëse Radical Weavers në Stirling. Vizita kishte për qëllim të nxirrte në pah trashëgiminë unike të Skocisë në fushën e tekstileve dhe mënyrën se si këto tradita vazhdojnë të lidhin komunitetet dhe të frymëzojnë brezat e rinj.
Në një video të shpërndarë nga fansat në Instagram, Princesha e Uellsit shihet teksa ulet pranë një vegje për të provuar endjen e tartanit, ndërsa Princi William qëndron pas saj. Në momentin kur Kate hoqi xhaketën blu me motive tartani për ta vendosur në karrige, William ndërhyri menjëherë për ta mbajtur, duke e palosur me kujdes dhe duke buzëqeshur lehtë.
Veshja e Kate Middleton nuk ishte e zgjedhur rastësisht. Ajo mbante një pallto të personalizuar nga stilisti britanik Chris Kerr, e punuar me lesh nga marka skoceze Johnstons of Elgin.
Sipas Vogue, Princesha Kate ka ndihmuar vetë në dizajnimin e palltos, duke shënuar një risi për të si bashkëpunëtore e kredituar në një veshje zyrtare. Ngjyrat blu dhe të bardha të palltos interpretohen si një homazh ndaj flamurit të Skocisë.
Radical Weavers ishte ndalesa e dytë nga tre angazhime që çifti mbretëror realizoi atë ditë. Gjatë vizitës, kamerat kapën edhe një tjetër moment të ngrohtë mes tyre, kur Kate qeshi dhe vendosi dorën mbi krahun e bashkëshortit.
Sipas vëzhguesve mbretërorë, Princi dhe Princesha e Uellsit janë shfaqur më të afërt dhe më të hapur në publik vitet e fundit, veçanërisht pas betejës shëndetësore të Kate Middleton. Në mars 2024, ajo bëri publike se po i nënshtrohej trajtimit për kancer, ndërsa në shtator përfundoi kimioterapinë. Në janar 2025, Princesha njoftoi se është në remision.
© Panoramaplus.al