Aktorja e njohur amerikane Sydney Sweeney ka rrëfyer se frika e saj më e madhe është të mbetet vetëm përgjithmonë. 28-vjeçarja e tha këtë gjatë një interviste për Vogue, ku u shfaq së bashku me kolegen Amanda Seyfried, me të cilën luan në filmin e ri “The Ad”.
Gjatë intervistës, Sweeney u pyet për frikën që e shoqëron më shumë. Pa hezitim, ajo pranoi se ideja e të kaluarit pjesën tjetër të jetës e vetme është ajo që e tremb më shumë.
Megjithatë, pavarësisht kësaj frike, aktorja aktualisht është në një marrëdhënie. Pas ndarjes nga ish-i fejuari i saj Jonathan Davino, me të cilin ishte së bashku për shtatë vjet, Sweeney është afruar me menaxherin Scooter Braun.
Sipas Page Six, Braun dhe Sweeney u panë për herë të parë së bashku në qershor, gjatë dasmës së Jeff Bezos dhe Lauren Sanchez në Venecia. Lajmet për romancën e tyre u bënë publike në shtator të vitit të kaluar, fillimisht të përshkruara si një flirt i shkujdesur.
Megjithatë, burime për Page Six thonë se marrëdhënia është bërë më serioze me kalimin e kohës, ndërsa paraqitjet e tyre publike janë shtuar ndjeshëm, duke treguar se nuk bëhet fjalë për një histori të rastësishme.
