Pas humbjeve të mëdha dhe përvojave të vështira personale, dy nga figurat më të njohura të viteve ’90, Liam Neeson dhe Pamela Anderson, janë duke përjetuar një kapitull të ri në jetën e tyre, një lidhje dashurie që ka ardhur në mënyrë të papritur, por të sinqertë.
Sipas një burimi të afërt me prodhimin e filmit të tyre të ri, “The Naked Gun”, Neeson, 73 vjeç, dhe Anderson, 58 vjeç, janë aktualisht në një lidhje dhe kanë nisur të ndajnë më shumë sesa vetëm skena në ekran. “Ata janë të magjepsur nga njëri-tjetri dhe po shijojnë çdo minutë së bashku,” ka thënë burimi për revistën People.
Nga dhimbja te paqja, një rrugëtim personal
Liam Neeson nuk kishte konfirmuar asnjë lidhje që pas vdekjes tragjike të bashkëshortes së tij, aktores Natasha Richardson, në vitin 2009. Çifti ishte martuar në vitin 1994 dhe kishin dy djem së bashku. Humbja e Richardson pas një aksidenti me ski në Kanada e kishte tronditur aktorin, i cili shpesh ka folur për dhimbjen që ndjeu pas largimit të saj.
“Ishte sikur të më nxirrnin zemrën nga kraharori,” kishte deklaruar Neeson, duke shtuar se nuk ishte më në humor për takime.
Ndërkohë, Pamela Anderson ka kaluar një jetë të ekspozuar ndaj medias dhe e mbushur me sfida. Marrëdhënia e saj me muzikantin Tommy Lee ishte një nga më të komentuarat në skenën e famshme, por e mbushur me dhunë, drama dhe skandale, përfshirë publikimin e një videoje intime pa pëlqimin e saj. Martesa përfundoi me ndarje dhe pas saj pasuan disa marrëdhënie të tjera që nuk zgjatën.
Në intervistat e fundit, Anderson ka folur për rëndësinë e paqes së brendshme dhe përpjekjet për të krijuar një marrëdhënie të shëndetshme për hir të fëmijëve të saj.
Dashuri në sheshxhirim: Si nisi gjithçka
Filmi i tyre i përbashkët, komedia “The Naked Gun”, shënoi momentin ku dy yjet filluan të afrohen. Gjatë xhirimeve dhe promovimeve, u vu re një kimi e dukshme mes tyre. Në paraqitjen në tapetin e kuq në New York më 28 korrik, ata u shfaqën bashkë, ndërsa një ditë më pas, në një paraqitje live në emisionin “Today”, u kapën nga kamera duke shkëmbyer një puthje të butë, që u bë virale në rrjet.
Një burim i brendshëm ka konfirmuar për People se marrëdhënia e tyre është ende në fillimet e saj, por e mbështetur mbi mirëkuptim, empati dhe histori personale të ngjashme. Të dy e kanë kaluar dhimbjen dhe tashmë, në moshën e pjekurisë, duket se kanë gjetur te njëri-tjetri një ndjesi të re sigurie dhe afërsie.
© Panoramaplus.al