“Lehte dhe mbante thikë në dorë”- Britney Spears përfshihet në incident në një restorant në Los Angeles

Britney Spears është bërë sërish pjesë e mediave rozë pas raportimeve për një incident të pazakontë në një restorant në Los Angeles, ku disa dëshmitarë pretendojnë se këngëtarja po bërtiste, leh­te dhe mbante një thikë në dorë.

Sipas raportimeve të publikuara nga TMZ, ngjarja dyshohet të ketë ndodhur mbrëmjen e së mërkurës në Blue Dog Tavern, ku Spears ndodhej në shoqërinë e dy personave të tjerë. Burime të cituara nga media amerikane thanë se artistja nisi të “bërtiste” dhe të “leh­te”, ndërsa një klient pretendoi se ajo kaloi pranë tavolinës së tij duke mbajtur një thikë.

Gazetari Jeff Snyder, i cili tha se ndodhej në të njëjtin restorant, e përshkroi situatën si “të egër”.

“Ajo sapo u largua dhe të gjithë në restorant filluan të flisnin për të. Një kliente kishte frikë për jetën e saj. Kjo nuk është shaka”, shkroi ai në platformën X.

Pas publikimit të lajmeve, përfaqësuesi i Britney Spears reagoi duke mohuar kategorikisht pretendimet dhe duke i cilësuar raportimet si të ekzagjeruara dhe mashtruese.

Në një deklaratë për People, zëdhënësi i këngëtares tha se Spears po kalonte një darkë të qetë me asistenten dhe truprojën e saj dhe se situata është keqinterpretuar.

“Britney thjesht po tregonte një histori për qenin e saj që lehte ndaj fqinjëve. Në asnjë moment ajo nuk e vuri askënd në rrezik me një thikë. Ajo po priste hamburgerin e saj”, thuhej në deklaratë.

Përfaqësuesi shtoi gjithashtu se këngëtarja vazhdon të jetë objekt i trajtimit të padrejtë nga media, duke e krahasuar situatën me periudhën e vështirë që ajo përjetoi vite më parë.

Ngjarja vjen vetëm pak ditë pasi Britney Spears publikoi në Instagram disa momente nga ajo që e quajti një “udhëtim shpirtëror”, ku shfaqej duke mbajtur një gjarpër të vogël dhe duke folur për ndryshimet në jetën e saj personale.

Ndërkohë, më 4 maj, avokati i saj Michael A. Goldstein pranoi fajësinë në emër të këngëtares për drejtim të pakujdesshëm, pas arrestimit të saj në mars në Ventura. Sipas vendimit të gjykatës, Spears u dënua me 12 muaj lirim me kusht dhe një gjobë prej 571 dollarësh.