22 Prill, 2026
FB Kryesore Lajmi Vip Panorama Plus

Kylie Jenner në telashe ligjore, paditet për diskriminim racor dhe fetar nga ish-punonjësja

2 muaj përpara

Kylie Jenner përballet me një padi nga një ish-punonjëse e saj shtëpiake, e cila pretendon se është diskriminuar për shkak të fesë dhe origjinës së saj. Megjithatë, sipas dokumenteve ligjore, akuzat nuk drejtohen drejtpërdrejt ndaj vetë Jenner, por ndaj anëtarëve të stafit të saj.

kylie jenner

Sipas padisë së depozituar javën e kaluar në Los Angeles nga Angelica Vasquez dhe të siguruar nga TMZ, paditësja pretendon se filloi punë si punëtore shtëpiake më 10 shtator 2024 në rezidencën e Jenner në Beverly Hills. Një javë më vonë, ajo u transferua në një tjetër pronë në Hidden Hills, ku raporton se ishte nën mbikëqyrjen e një gruaje të quajtur Elsie dhe drejtueses së stafit të pastrimit, Patsy.

Në dokumente thuhet se që nga fillimi i punës ajo është përballur me “trajtim armiqësor dhe përjashtim”, si dhe me “ngacmime të rënda dhe të vazhdueshme” nga mbikëqyrëset dhe anëtarë të tjerë të stafit. Sipas saj, ajo është “nënçmuar dhe poshtëruar para kolegëve” për shkak të racës, etnisë dhe besimit të saj fetar.

Vasquez, e cila deklaron se është nga El Salvadori dhe besimtare katolike, pretendon se është ofenduar me komente si “katolikët janë njerëz të tmerrshëm” dhe është tallur për statusin e saj si emigrante. Ajo shton se janë bërë edhe referenca për deportimin e personave me prejardhje të ngjashme me të.

Përveç kësaj, ajo pretendon se i janë caktuar detyrat më të vështira, është përjashtuar qëllimisht nga grupi i pastrimit dhe është trajtuar me përçmim, deri në bërtitje të vazhdueshme. Në një rast, sipas saj, një mbikëqyrës i hodhi varëse rrobash gjatë një përplasjeje verbale, pasi ajo kishte ngritur shqetësime për trajtimin që po merrte.

Si pasojë e kushteve të punës, paditësja deklaron se ka zhvilluar ankth dhe simptoma që përputhen me çrregullimin e stresit post-traumatik, gjë që, sipas saj, përkeqësoi situatën dhe çoi në dorëheqjen e saj në gusht 2025. Ajo pretendon gjithashtu se ankesat e saj nuk u morën parasysh.

Në padi kërkohet kompensim për paga të papaguara dhe dëme morale. Nga ana tjetër, burime të cituara raportojnë se paditësja kishte probleme me frekuentimin në punë dhe çështje të tjera të brendshme gjatë periudhës së punësimit.

Edhe pse Kylie Jenner përfshihet si e pandehur në këtë çështje, padia fokusohet kryesisht në veprimet e stafit të saj dhe në dështimin e pretenduar për të adresuar ankesat e ngritura.

© Panoramaplus.al