Mickey Madden, ish-basisti i grupit të njohur Maroon 5, po përballet me akuza serioze për dhunë në familje dhe sjellje të papërshtatshme ndaj një të miture, sipas dokumenteve gjyqësore të paraqitura nga gruaja e tij, Kate Bowman.
Sipas raportimit të TMZ, Bowman ka deklaruar se më 21 korrik, mori një paralajmërim nga një person anonim lidhur me komunikimet online të Madden me vajza të mitura. Ajo pretendon se në ato biseda përfshiheshin fantazi përdhunimi dhe dërgim fotosh provokuese, duke ngritur alarmin për sjellje shqetësuese dhe të rrezikshme nga ana e muzikantit.
Kur ajo e përballi me akuzat, Madden dyshohet se shfaqi një sjellje agresive, duke e shtyrë me forcë në banakun e kuzhinës dhe më pas duke e nxjerrë jashtë shtëpisë së tyre në Los Angeles, ndërsa ishte vetëm me të brendshme. Kate pretendon se ai e ndoqi, e hodhi pas një porte, dhe pas një momenti të shkurtër kur u fsheh për të kërkuar telefonin, ai e shtyu sërish pas një muri me tulla.
Në dëshminë e saj, Bowman thotë se:
“Nuk e njoha burrin me të cilin isha martuar. Ai tregoi një anë të dhunshme që nuk e kisha parë kurrë më parë.”
Pas incidentit, ajo qëndroi përkohësisht në shtëpinë e një shoqeje. Dokumentet gjyqësore tregojnë se Madden më vonë i ka dërguar mesazhe dhe letra, duke i kërkuar falje dhe duke deklaruar synimin për t’u trajtuar për varësi seksuale në një qendër detoksifikimi.
Bowman ka kërkuar një urdhër të përkohshëm mbrojtjeje për dhunë në familje, duke theksuar se ndjehet e tmerruar dhe e traumatizuar nga ajo që ka ndodhur. Megjithatë, kërkesa që Madden të largohej nga banesa e përbashkët është refuzuar nga gjykata.
Ajo ka deklaruar gjithashtu se gjatë martesës së tyre pesëvjeçare, ai e mbajti të varur financiarisht, dhe se tani ka marrë një punë dhe një apartament të vogël me qira ku ai mund të transferohet, në mënyrë që ajo të qëndrojë në shtëpinë ku jetojnë aktualisht.
Kate Bowman po kërkon gjithashtu:
Mbështetje financiare për fëmijët
Kujdestarinë e dy qenve të tyre, huskies siberianë me emrat Toast dhe Jam
Mickey Madden, 46 vjeç, ka një histori të mëparshme me ligjin. Ai u largua nga Maroon 5 në vitin 2020, pas një arrestimi për dhunë në familje. Po ashtu, në vitin 2016, ai u arrestua për posedim kokaine, për të cilën u dënua me një ditë shërbim komunitar.
© Panoramaplus.al