Gjërat “e vogla” që mund t’i fshihni mjekut, por që janë më të rëndësishme se analizat

Shumë njerëz, kur vizitojnë mjekun, kanë tendencën të thonë “jam mirë”,  shpesh nga zakoni ose për të shmangur bisedat e sikletshme. Por ekspertët paralajmërojnë se pikërisht ato që ne i konsiderojmë të vogla ose të parëndësishme, mund të jenë shenja të hershme të problemeve serioze shëndetësore.

Në vijim janë disa nga “rrëfimet” që, sipas mjekëve, duhen bërë gjatë vizitës, edhe nëse duken të sikletshme apo të padëmshme:

1. “Nuk i marr gjithmonë pilulat siç duhet”

Harrimi i dozave apo ndërprerja e ilaçeve (si antibiotikët) pa këshillën e mjekut mund të ndikojë në efektin e trajtimit. Mjeku nuk është aty për t’ju qortuar, por për të kuptuar nëse nevojitet rregullim i terapisë.

2. “Kam diçka të sikletshme për t’ju thënë”

Kruarje intime, ndryshime në erë trupore, ose gjurmë gjaku në tualet – të gjitha janë shqetësime që pacientët ndonjëherë i anashkalojnë. Megjithatë, këto simptoma mund të ndihmojnë mjekun të dallojë ndërmjet një problemi të lehtë dhe një sëmundjeje që kërkon trajtim të menjëhershëm.

3. “Humori im ka ndryshuar papritur”

Stresi, ankthi apo trishtimi i vazhdueshëm nuk janë gjithmonë vetëm çështje psikologjike. Ndryshimet emocionale mund të lidhen me çekuilibra hormonalë, probleme me gjumin apo sëmundje që ndikojnë në sistemin nervor. Ndaj, mos i anashkaloni.

4. “Po, marr edhe disa suplemente”

Edhe vitaminat që duken “të pafajshme” mund të ndikojnë në efektin e ilaçeve ose në rezultatet e analizave. Informoni mjekun për çdo suplement, qoftë ai magnez, omega-3 apo bimë medicinale.

5. “Ndonjëherë kam dhimbje, por e injoroj”

Dhimbje të vogla të përsëritura në shpinë, gjoks apo këmbë nuk duhet të injorohen. Ato mund të jenë paralajmërime të hershme për probleme serioze si inflamacion, probleme të zemrës apo qarkullimit të gjakut.

Mos luani rolin e “të fortit” te mjeku

Në vend që të fshehni ose minimizoni simptomat, ndihmoni mjekun të ketë një pamje të plotë të shëndetit tuaj. Shpesh, ajo që pacienti e quan “e vogël”, për mjekun është informacion kyç që mund të bëjë diferencën në diagnozë dhe trajtim.