Modelja e njohur Gigi Hadid ka reaguar pasi emri i saj u përmend në dosjet e Jeffrey Epstein, duke e cilësuar të gjithë situatën si shqetësuese dhe të rëndë emocionalisht.
30-vjeçarja, së bashku me motrën e saj Bella Hadid, rezulton të jetë përmendur në një shkëmbim emailesh të vitit 2015, i cili u përfshi në dokumentet e publikuara nga Departamenti i Drejtësisë i SHBA-së. Duke iu përgjigjur një komenti në Instagram, siç raporton Daily Mail, Hadid e përshkroi Epstein si një “person të neveritshëm” dhe theksoi se nuk ka pasur kurrë asnjë lidhje me të.
“Është e tmerrshme të lexosh dikë që nuk e ke takuar kurrë të flasë për ty në atë mënyrë, veçanërisht në një kontekst të tillë,” u shpreh ajo. Modelja shtoi se fillimisht kishte zgjedhur të mos reagonte publikisht, për të mos larguar vëmendjen nga dëshmitë e viktimave reale.
Hadid gjithashtu sqaroi se karriera e saj në industrinë e modës është ndërtuar vetëm mbi punën e saj dhe jo mbi privilegje apo ndërhyrje. Ajo theksoi se ka nënshkruar kontratën e parë me një agjenci modelimi në vitin 2012 dhe që prej asaj kohe ka punuar pa ndërprerje.
“Përmendja e emrit tim në këto dosje është shqetësuese dhe dua të jem e qartë: nuk kam pasur kurrë asnjë lidhje me këtë person,” deklaroi ajo.
Në fund, Hadid theksoi se, edhe pse është rritur në një mjedis të privilegjuar, prindërit e saj i kanë mësuar rëndësinë e punës së palodhur, të cilën ajo e konsideron thelbësore për suksesin e saj.
Gigi Hadid breaks silence on her appearance in the Epstein files: ‘Disgusting’ https://t.co/zw3zLyzCE8
— Daily Mail (@DailyMail) April 5, 2026
Çfarë përmbajnë dosjet Epstein për motrat Hadid
Sipas dokumenteve të publikuara nga Departamenti i Drejtësisë i SHBA-së, Jeffrey Epstein dyshohet se ka diskutuar për karrierën e motrave Hadid në modelim në një shkëmbim emailesh të datës 3 dhjetor 2015.
Biseda nis me një person të panjohur, që besohet të jetë i lidhur me industrinë e modës, i cili e pyet Epstein: “Si u bënë Hadid-ët modele dhe fituan kaq shumë para? Nuk e kuptoj.”
Epstein përgjigjet shkurt: “E di”, duke mohuar më pas pretendimin se babai i tyre kishte paguar agjencinë e modelimit.
Në një tjetër mesazh, bashkëbiseduesi shprehet se “ka shumë vajza që bëjnë gjëra të kota”, me Epstein që i përgjigjet: “Pajtohem.”
Kur pyetet sërish për motrat Hadid me pyetjen “Nëse ato munden, pse nuk mundem edhe unë?”, Epstein përgjigjet: “Sepse ato ndjekin udhëzimet. Është kaq e thjeshtë.”
