Andy Byron, drejtori ekzekutiv i kompanisë së softuerëve Astronomer, është pezulluar nga detyra pas një incidenti që u bë viral në rrjetet sociale: një marrëdhënie e fshehtë me një kolege u zbulua publikisht gjatë një koncerti të Coldplay në Boston.
Çifti, i përbërë nga Byron dhe Christine Cabot, drejtore e Burimeve Njerëzore në të njëjtën kompani, u shfaq në ekranin gjigant të stadiumit duke u përqafuar gjatë momentit të njohur si “kamera e puthjes”. Pamjet u kapën në video dhe u shpërndanë me shpejtësi në TikTok, ku videoja ka mbledhur tashmë mbi 80 milionë shikime.
Sipas raportimeve, sapo panë veten në ekran, të dy u përpoqën të fshiheshin, duke shkaktuar dyshime dhe interes të madh publik. Ky moment çoi në zbulimin e marrëdhënies së tyre, e konsideruar në shkelje të politikave të kompanisë.
Deklarata zyrtare e Astronomer
Në një deklaratë publike, Astronomer konfirmoi pezullimin e CEO-së dhe njoftoi nisjen e një hetimi të brendshëm:
“Astronomer mbetet besnik ndaj vlerave dhe kulturës që na kanë udhëhequr që nga themelimi ynë. Udhëheqësit tanë duhet të jenë modele në çështjet e sjelljes dhe llogaridhënies. Bordi i Drejtorëve ka nisur një hetim formal për rastin dhe njoftime të mëtejshme do të bëhen së shpejti.”
Kompania shtoi gjithashtu se Andy Byron është lënë në pushim, ndërsa detyrën e CEO-së e ka marrë përkohësisht Pete DeJoy, bashkëthemelues dhe Drejtor i Produkteve i Astronomer.
Asnjë deklaratë personale nga Byron
Përmes një postimi zyrtar në platformën X (ish-Twitter), Astronomer sqaroi se Andy Byron nuk ka bërë asnjë deklaratë publike personale lidhur me incidentin dhe distancoi kompaninë nga postime të rreme që i atribuoheshin atij.
“Në video nuk shfaqen punonjës të tjerë të Astronomer, përveç z. Byron dhe znj. Cabot,” theksoi kompania.
© Panoramaplus.al