Drande Xhaj është një ndër aktoret më të dashura të humorit. Aktorja shkodrane për vite me radhë ka bërë për të qeshur publikun që e ka ndjekur në sallë dhe ata që e kanë ndjekur përmes ekranit.
Por ndërsa në skenë iu është dashur të qeshë, Drande ka rrëfyer momentet më të vështira përpara publikut.
E ftuar në Wake Up, ajo rrëfeu se momenti më i dhimbshëm ishte vdekja e bashkëshortit të saj.
Ai humbi jetën papritmas nga një atak në zemër dhe aktorja po bënte provat në teatër kur e morën në telefon.
Për rreth 3 muaj qëndroi larg skenës derisa kolegu i saj e bindi të rikthehej.
Ajo u shpreh se kur u ngjit në teatër, filloi të qante ndërsa i duhej të qeshte.
“Kam shumë vite në skenë dhe nuk mund të shkëputemi nga problemet, hallet, humbjet. Momente të vështira kam pasur. Më i vështiri në jetën time ka qenë kur humba bashkëshortin tim. Në maj bëhen 14 vite që është larguar nga jeta. Atë natë që më vdiq bashkëshorti kisha premierë, ai vdiq papritur nga një atak kardiak, ishte vdekje e papritur, biletat ishin shitur të gjitha. Kisha provë gjeneralë në mëngjes kur më lajmëroi një i afërt që po e dërgonin me ambulancë në spital.
Menjëherë lashë provën gjenerale pa i thënë askujt. Ika dhe ai për një orë e gjysmë nuk ishte më. U anulua shfaqja. Për 2-3 muaj nuk shkova në teatër, kolegu Zef Deda erdhi dhe shkova në Vlorë për festivalin e estradave. Çuditërisht kur dola në skenë të gjithë filluan të duartrokisnin dhe unë u befasova. Siç duket e kishin marrë vesh, mbështetja e tyre më bëri të bëhesha edhe më e fortë. Më e vështirë ishte kur u ktheva në Shkodër.
Kisha disa dialogje dhe për shumë minuta nuk më lanin të fillonin dhe qava në skenë. Ishte e vështirë sepse materialet ishin me humor. Dhe të ktheheshe në humor nga një gjendje aq dramatike ishte e vështirë,”- tha aktorja.
