Pikëpamja se ish-Princi Andrew duhet të dëshmojë para një komisioni të Kongresit Amerikan në lidhje me marrëdhënien e tij me Jeffrey Epstein, u shpreh nga kryeministri britanik Keir Starmer, pas publikimit të dokumenteve të reja nga Departamenti Amerikan i Drejtësisë.
Duke folur me gazetarët pas kthimit të tij nga Japonia, kryeministri britanik tha:
“Lidhur me dëshminë, gjithmonë kam thënë se kushdo që ka informacion duhet të jetë i përgatitur ta ndajë atë në çdo formë që i kërkohet.”
“Nuk mund të përqendrohesh te viktimat nëse nuk je i përgatitur ta bësh këtë. Viktimat e Epstein duhet të jenë përparësia. Sa i përket faktit nëse duhet të ketë një kërkimfalje, kjo është punë e Andrew-t”, shtoi ai.
Kujtohet se u publikuan fotografi që dyshohet se e përshkruajnë Princin Andrew në momente kontroverse me një grua të shtrirë në dysheme. Në fotografi, sipas përshkrimeve që shoqërojnë materialin, një burrë që i ngjan ish-Dukës së Jorkut, shihet duke u përkulur mbi një grua, ndërsa në njërën prej imazheve ai shikon drejtpërdrejt kamerën.
Ashtu si me pjesën më të madhe të materialit të përfshirë në të ashtuquajturat “dosjet Epstein”, nuk specifikohet se kur dhe ku janë bërë fotot, as nuk jepet ndonjë shpjegim shtesë.
Kujtohet se në një grup të mëparshëm dokumentesh, një foto e Princit Andrew në një rezidencë private, i rrethuar nga gra, kishte tërhequr tashmë kritika të ashpra.
Dokumentet e reja u publikuan nga Departamenti i Drejtësisë i SHBA-së, i cili njoftoi se ishin bërë deklasifikime të gjera, me qëllim mbrojtjen e viktimave dhe sigurimin e hetimeve aktive.
© Panorama.al
