Polonia i ka kërkuar zyrtarisht Shteteve të Bashkuara arrestimin dhe ekstradimin e ish-ministrit të Drejtësisë, Zbigniew Ziobro, për t’u përballur me drejtësinë nën akuzat për abuzim me pushtetin, shpërdorim të fondeve publike dhe spiunazh ndaj kundërshtarëve politikë.
Kërkesa është dorëzuar të hënën përmes kanaleve diplomatike nga ministri i Drejtësisë, Waldemar Żurek, njoftoi Zyra e Prokurorit Kombëtar të Polonisë.
Qeveria pro-evropiane e kryeministrit Donald Tusk është zotuar të hetojë dhe të mbajë përgjegjës ish-drejtuesit e partisë nacionaliste Ligj dhe Drejtësi (PiS) për abuzimet e dyshuara gjatë periudhës së qeverisjes së tyre, nga viti 2015 deri në vitin 2023.
Sipas prokurorëve, kërkesa për ekstradim përfshin 19 nga 26 veprat penale për të cilat Ziobro pritet të akuzohet. Mes tyre janë drejtimi i një grupi të organizuar kriminal brenda Ministrisë së Drejtësisë, abuzimi me detyrën, manipulimi i konkurseve për ndarjen e granteve në favor të organizatave pranë qeverisë dhe përdorimi i softuerit të përgjimit Pegasus për të monitoruar kundërshtarët politikë.
Ziobro konsiderohet një nga figurat më të debatueshme të qeverisë së mëparshme. Gjatë kohës që drejtonte Ministrinë e Drejtësisë, ai ndërmori reforma të thella në sistemin gjyqësor, të cilat i dhanë qeverisë ndikim të madh mbi prokurorët dhe kontroll disiplinor ndaj gjyqtarëve, duke shkaktuar përplasje të forta mes Varshavës dhe Bashkimit Evropian.
Pas largimit nga Polonia, Ziobro mori azil në Hungari nga qeveria e Viktor Orbán, aleate politike e PiS. Megjithatë, pas ndryshimit të qeverisë në Budapest, kryeministri Péter Magyar deklaroi se ishte i gatshëm ta dorëzonte atë autoriteteve polake.
Përpara se të ndërmerreshin hapat për ekstradimin e tij nga Hungaria, Ziobro u largua drejt Shteteve të Bashkuara në muajin maj, ku nisi punë si komentator politik në televizionin polak TV Republika, i njohur për qëndrimet pro PiS.
Në atë kohë, ai deklaroi se “Shtetet e Bashkuara janë liri. Liri për të cilën mund të luftosh”.
Ish-ministri i Drejtësisë ka mohuar të gjitha akuzat, duke i cilësuar ato si “të fabrikuara” dhe duke akuzuar kryeministrin Donald Tusk se po përdor drejtësinë për hakmarrje politike.
Ai ka paralajmëruar se, nëse PiS rikthehet në pushtet pas zgjedhjeve parlamentare të planifikuara për vjeshtën e vitit 2027, do të ndërmarrë veprime ligjore ndaj Tusk dhe anëtarëve të kabinetit të tij.
Ndërkohë, skena politike në Poloni është bërë më e paqartë, pasi javën e kaluar rreth 40 deputetë, të udhëhequr nga ish-kryeministri Mateusz Morawiecki, u larguan nga PiS. Sondazhet e fundit tregojnë se as koalicioni i drejtuar nga Donald Tusk nuk pritet të sigurojë një shumicë të qartë në parlamentin e ardhshëm.
© Panorama.al
