“Një zhdukje e dytë, si e dinozaurve”, CNN: Shkencëtarët parashikojnë formimin e një “superkontinenti”, ku njerëzit nuk do të mund të jetojnë

Të gjithë kontinentet ekzistuese mund të bashkohen për të formuar një ‘superkontinent’ në një hark kohor prej 250 milion vitesh. Në këtë përfundim kanë mbërritur shkencëtarët nga Universiteti i Bristolit në Mbretërinë e Bashkuar, pasi përdorën modelet e para të klimës për të ardhmen e largët.

Ata zbuluan se pas një kalimit të një periudhe kohe, toka mund të bëhet e pabanueshme në shumë zona të saj, për shkak të temperaturave të larta dhe thatësirës.
Gjatë studimit të tyre, ata stimuluan tendencat e temperaturës, erës, shiut dhe lagështisë për superkontinentin dhe përdorën modele të lëvizjes së pllakave tektonike, kimisë së oqeanit dhe biologjisë për të llogaritur nivelet e dioksidit të karbonit.

Ata zbuluan se jo vetëm që formimi i superkontinentit të cilin e kanë quajtur ‘Pangea Ultima’ do të çonte në shpërthime më të rregullta vullkanike, duke nxjerrë dioksid karboni në atmosferë dhe duke ngrohur planetin, por edhe dielli do të bëhej më i ndritshëm, duke emetuar më shumë energji dhe duke ngrohur më tej Tokën.

“Superkontinenti i saposhfaqur do të krijonte në mënyrë efektive një goditje të trefishtë që përfshin efektin e kontinentit, nxehtësi më e madhe nga dielli dhe më shumë dioksid karboni në atmosferë,” tha në një njoftim të hënën Alexander Farnsworth, bashkëpunëtor i lartë kërkimor në Universitetin e Bristol dhe autori kryesor i letrës.

Ndërsa, temperaturat ekstreme nga 40 deri në 50 gradë Celsius të shoqëruara nga nivelet e larta të lagështisë do të vulosnin përfundimisht fatin tonë, shkruhet në letrën e botuar në revistën ‘Nature Geoscience’.

Njerëzit dhe speciet e tjera nuk do të mund t’i mbijetojnë ndryshimeve të tilla të kushteve atmosferike. Gjithashtu, rritja e nxehtësisë, do të krijonte një mjedis pa burime ushqimi ose uji për gjitarët, shkruhet po ashtu në studim.

Me gjithë pasiguritë e mëdha mbi parashikimet në një hark kohor kaq të largët dhe të gjatë, shkencëtarët thonë se fotografia duket “shumë e zymtë”, dhe vetëm 8% deri në 16% e tokës në superkontinent mund të mbetet e banueshme për gjitarët.

Kujtojmë se shkencëtarët kanë paralajmëruar për dekada që ngrohja duhet të qëndrojë nën 1.5 gradë Celsius mbi nivelet para-industriale, me mundësinë për të shkurtuar varësinë tonë nga karburantet fosile dhe për të shmangur ndryshimet katastrofike. Ndërsa zhdukja e fundit masive ndodhi rreth 66 milionë vjet më parë, kur një asteroid u përplas në Tokë dhe vrau dinosaurët dhe shumicën e jetës në planet./ CNN