Një 31-vjeçar nga Puka u ekzekutua mbrëmjen e djeshme me 7 plumba, teksa lëvizte me motor në rrugën dytësore të autostradës, tek mbikalimi i Kamzës në Tiranë.Sipas policisë, viktima e atentatit është Paulin Marku, i cili është qëlluar për vdekje me armë zjarri nga persona që ndodheshin në një makinë në ecje e sipër. Automjeti është identifikuar dhe, sipas burimeve, është një makinë tip “Benz”, me targë TR 63 21 M. Ngjarja ndodhi rreth orës 21:00, në rrugën dytësore mes spitalit grek dhe mbikalimit të Kamzës, kur i riu po lëvizte me një motor në drejtim të autostradës. Dyshimet e para të ngritura nga grupi hetimor për motivet e ngjarjes janë se i riu mund të jetë ekzekutuar për motive hakmarrjeje. Sipas policisë, dyshohet se vrasja ka lidhje me veprimtarinë e tij si emigrant në Itali, disa vjet më parë. Ngjarja megjithatë vazhdon të jetë e mbuluar me mister edhe nga ekspertët e policisë, pasi nga verifikimet që u kryen për viktimën Paulin Marku, i cili është nga një fshat i Pukës, rezulton që nuk ka asnjë precedent të mëparshëm penal. Në vendin e ngjarjes janë sekuestruar 7 gëzhoja, që dyshohet se i përkasin një arme tip “Pistoletë”. Ndërsa motori me të cilin lëvizte viktima para se të vritej ishte ende i ndezur, në momentin që policia mbërriti në vendin e ngjarjes. Kjo shpjegon se 31-vjeçari Marku ka qenë duke lëvizur me motor kur është qëlluar. Disa dëshmitarë të shoqëruar në polici për të dhënë deklarime kanë hedhur dritë edhe mbi mjetin nga i cili është qëlluar me armë.
VIKTIMA
Nga verifikimet që policia kreu mbrëmë në lidhje me aktivitetin e Paulin Markut, i cili u ekzekutua me 7 plumba, rezulton që ai nuk ka precedent penalë, që të kenë shërbyer si motiv për vrasjen. Policia tha se viktima rezulton të jetë i martuar dhe i punësuar në një kompani call center, gjithashtu edhe bashkëpronar i një mobilierie me vëllezërit e tij, në autostradën Tiranë-Durrës. Njëri prej vëllezërve të viktimës është punonjës i Gardës së Republikës. Në lidhje me të shkuarën e tij, oficerët e grupit hetimor kanë zbuluar se vite më parë ai ka qenë emigrant në Itali, ku ka qëndruar për një kohë të gjatë. Sipas burimeve atje, dyshohet se mund të ketë kryer trafiqe të paligjshme, edhe pse nuk ka qenë i proceduar penalisht nga policia italiane apo ajo shqiptare. Motivi i vrasjes, sipas policisë, dyshohet se lidhet pikërisht me veprimtarinë e tij në Itali. Nga mënyra dhe se si është kryer vrasja, që sipas policisë është e studiuar dhe e paramenduar, madje autorët dyshohet ta kenë ndjekur viktimën dhe më pas e kanë qëlluar, burimet nga grupi hetimor u shprehën mbrëmë se duhen kryer shumë verifikime për të arritur në një pistë konkrete.
ETLEVA DELIA
