Deputeti i LVV-së Enver Dugolli, është shprehur se ka informacione se qëllimi i kriminelëve serb në veri të Kosovës ishte që të vrisnin sa më shumë policë.
Komentet Dugolli i bëri në “Pressing” në T7, ku tha se në Banjskë u kap armatim ushtarak që gjendet vetëm në depo ushtarake.
“Bëhet fjalë për armatim ushtarak i cili nuk gjendet në treg të lirë, nuk mund t’i gjesh në dyqane armësh. Vuçiçit i ka dështu plani. Plani ka qenë që fillimisht të vriten sa më shumë policë”, u shpreh Dugolli.
“Sipas informatave që kam, Policia e ka pa fillimisht rrugën e bllokuar dhe kanë thirrë kolegët e tyre për përforcime, nuk ka pas asnjë lëvizje. Në momentin që kanë shku me përforcime dhe kanë dalë tek ai vendi, ata kanë fillu të shtëna nga të dyja anët, ka qenë prita L, pritë profesionale-ushtarake, për me shkaktu viktima të shumta në polici. Tre ju kanë duk pak, në momentin që të vinë shumë, atëherë të shtien me të gjitha edhe kanë shti ashtu. Profesionalizmi i tyre dhe në njëfarë forme policët kanë fillu kundërsulm dhe e kanë tërheq rreshterin Bunjaku dhe kanë fillu të shtënat me ta. Pastaj kanë ardhë ende përforcime, por me automjete të blinduara dhe sulmuesit janë tërheq duke u futur në manastir”, tregoi ai.
Ai tha se për sulmin në veri ekzistonte edhe një skenar i dytë, ku sipas tij, qëllimi ka qenë që nga sulmi i policisë të vriteshin civilë dhe pelegrinë dhe ky lajm të shpërthente në të gjithë botën, sikur Kosova shkel kultet fetare.
“Skenari i dytë, ka qenë, se aty ka pas pelegrinazh, civil dhe klerikë fetarë. Kanë mendu që policia do t’i sulmojë dhe në sulm e sipër vriten civilë e pelegrinazh, prishet manastiri, dhe ky lajm të shpërthejë në gjithë botën e të akuzohet Kosova se po shkelë edhe në kultet fetare. Ky ka qenë kurthi më i rrezikshëm për Kosovën”, tha ai.
NDIQE LIVE "PANORAMA TV" © Panorama.al
