Nevil Dede është përpjekur që këtë sezon të bëjë një ndërthurje të lojtarëve me eksperiencë dhe të rinjve, për të krijuar një Elbasan konkurrues. Dhe mund të themi që ia ka dalë me sukses. Diferencën nuk po e bën përvoja e atyre që erdhën nga merkatoja, por edhe elementët e dalë nga akademia e verdhebluve. Shembulli më i mirë është Klevis Kasa, që ka fituar besimin e trajnerit dhe një vend titullari.

Është një “xhol” i vërtetë në fushë, pasi nga mesfushor i avancuar është tërhequr në mbrojtje. Autori i atij goli spektakolar ndaj Apolonisë, në një intervistë të dhënë enkas për “Panorama Sport”, emocionet e 548 minutave në fushë. 20-vjeçari vlerëson shpirtin e garës që tregojnë të gjithë futbollistët dhe është i bindur që në fund të edicionit skuadra do të jetë në vendin e parë.

Klevis, si është të luash me Elbasanin?

Të mbash veshur këtë fanellë është një nder për mua. Ne vërtet jemi një ekip i krijuar tri vite më parë, por historia jonë është më e largët se kaq. Kjo më shton angazhimin mua dhe gjithkujt, që të japim gjithçka. Ne kemi një mision dhe do të arrijmë ta çojmë Elbasanin aty ku e meriton.

Nga sulmi në mbrojtje, si ndiheni në rolin e ri në skuadër?

Është një roli i ri për mua, por është gjithçka në rregull. Ndihem shumë mirë edhe në mbrojtje, pastaj kjo nuk ka shumë rëndësi për mua, und të luaj në çdo cep të fushës. Kudo që të luaj, di që duhet të japësh shpirtin dhe gjithçka aty.

E mbyllët fazën e parë në vendin e dytë, jeni të kënaqur?

Fazën e parë duhet të kishim bërë më tepër, për të qenë më të kënaqur. Sidoqoftë, kampionati nuk ka mbaruar ende. Vjen faza e dytë edhe jam i sigurt që do të mbyllet në vendin e parë.

Pse jeni kaq të bindur?

Sepse ne jemi Elbasani, një ekip me shumë emër, cilësi e mbi të gjitha që jep shpirtin në fushë.

Të mërkurën prisni Kastriotin në “Elbasan Arena”…

Është një ndeshje që duhet vlerësuar si çdo ndeshje tjetër. Nuk ka rëndësi cili ekip është përballë, ne kemi synimin të marrim pikët maksimale edhe të vazhdojmë ecurinë me rezultate pozitive në çdo javë.

Çfarë ka skuadra e Elbasanit më shumë sesa rivalët e tjerë?

E preka edhe pak më lart, ky ekip ka emër, kualitet e shpirt gare. Komponentë që vlejnë për të arritur atë që ne duam dhe ajo që ne duam është të dalim kampionë. Kjo gjë shihet brenda grupit, te harmonia me njëri-tjetrin, te ndihmesa e lojtarëve me eksperiencë, te më të rinjtë. Lojtarë që japin zemrën për këtë fanellë, duke e ditur se sa vlerë ka ajo. Ky ekip nuk njeh rival. Pa harruar sigurisht edhe mbështetjen e tifozëve, që është suport më vete në çdo ndeshje për ne.

VLADIMIR MEMA-PANORAMASPORT.AL

NDIQE LIVE "PANORAMA TV"

---