Dinamo dhe Vllaznia kanë ndarë pikët në duelin e tyre në “Elbasan Arena”, në një sfidë ku episodet sollën barazimin 1-1 që u mbyll në fakt me polemika.

Dy skuadrat në fushë dhuruan pak gjëra për t’u kujtuar në pjesën e parë, teksa rrallëherë tentuan portën kundërshtare. Pjesa e dytë nisi me një penallti të fituar nga Gruda e të transfermuar saktësisht nga Balaj i cili më pas shpërdori mundësinë e golit të dytë,

Dinamo gjeti barazimin në minutat e fundit me anë të Bardhit, teksa më pas kërkoi edhe një penallti me Zabërgjën, por përkundrazi ky i fundit u ndëshkua me të verdhë për simulim, duke marrë kështu të kuqin. Një vendim i gjyqtarit Koçi pa rishikuar pamjet në VAR, që tensionoi dinamovitët deri në vërshëllimën përfundimtare.

DINAMO-VLLAZNIA 1-1
84′ Bardhi / 51′ (p) Balaj

NGJARJET KRYESORE

90’+7’ Mbyllet ndeshja me barazimin 1-1.

90’+1′ Delaj merr vendin e Grudës në radhët e Vllaznisë, ndërsa Mija të Denison te Dinamo.

90’ Jepen 6 minuta shtesë.

89’ Çoba ka mundësinë e qartë që të shënojë golin e fitores, por pak hapa larg portës çon sferën jashtë. (VIDEO)

88’ Episod shumë i diskutueshëm në minutën e 89. Zabërgja hyn në zonë dhe pastaj rrëzohet, ai kërkon penallti për prekjen e Krymit, por gjyqtari Koçi sheh simulim dhe i jep të dytin të verdhë, duke e larguar nga fusha e lojës. (VIDEO)

84’ GOOOL DINAMO! Kaçorri nga e djathta shpërthen në zonë dhe pasion për Bardhin i cili gjuan me të parën dhe barazon shifrat. (VIDEO)

80’ Kaçorri merr vendin e Vilës në radhët e Dinamos, ndërsa te Vllaznia është Çeshmedjev ai i cili aktivizohet në vend të Alivodës.

77’ Krymi ndëshkohet me karton të verdhë pas një faulli në mesfushë.

75’ Marku provon gjuajtjen nga distanca në të djathtën pa shumë sukses pasi sfera shkon larg portës.

72’ Denison tenton me një goditje dënimi të gjejë një shok të skuadrës në zonë, por topi shkon direkt në duart e Mëhidrit.

67’ Zabërgja nga e majta gjen fundoren dhe pason në zonë, topi largohet dy herë radhazi nga mbrojtja e kuqebluve.

65’ Tusha dhe Gudiabi lënë fushën e lojës për t’i bërë vend Bardhit dhe Krasniqit në radhët e Dinamos.

60’ Vllaznia është pak më e tërhequr në këto minuta, duke i lënë terren Dinamos për të tentuar kundërsulmin.

55’ Situata zhvendoset në anën tjetër ku Çoba, nga e djathta, pason në qendër për Balajn. Ky i fundit shpërdoron golin e dytë teksa gjuajtja e tij ndalet me vështirësi nga Rexhepi. (VIDEO)

54’ Tenton menjëherë të barazojë Dinamo, me Zabërgjen i cili gjuan, por gjen “murin” e Krymit i cili ndal topin me trup. (VIDEO)

51’ GOOOL VLLAZNIA! Shënon Balaj me penallti. (VIDEO)

49’ Penallti për Vllazninë! Pas një topi në zonë, Gruda prek sferën para Rexhepit i cili bën kontakt me sulmuesin dhe ky i fundit rrëzohet. Gjyqtari Koçi bën shenjë nga pika e bardhë dhe ndëshkon me të verdhë gardianin. (VIDEO)

46’ Pjesa e dytë nis me zëvendësim te Vllaznia, pasi Çoba merr vendin e Pusit.

45’+4′ Mbyllet pa gola pjesa e parë. 

45’+2’ Boshnjaku gjuan nga distanca, Rexhepi grushton dhe pastaj Balaj i vetëm çon topin mbi traversë. Për më pas vijërojtësi sinjalizon për një pozicion jashtë loje të sulmuesit shkodran. (VIDEO)

45’ Jepen 4 minuta shtesë.

41’ Edhe Vila tenton nga ana tjetër, me sferën që shkon larg katërkëndorit.

40’ Mala gjuan nga jashtë zonës duke çuar topin në duart e Rexhepit, për atë që është tentativa e vetme e shkodranëve në këtë pjesë të parë deri tani.

38’ Gudiabi ndëshkohet me karton të verdhë për një faull ndaj Malës.

33’ Stojanoviç fiton një duel shpejtësie me Tushën duke bllokuar lojtarin e Dinamos i cili kishte marrë një top në thellësi dhe po i afrohej rrezikshëm portës.

32’ Mala është i vetmi që krijon diçka në radhët e skuadrës shkodrane me depërtimet e tij në të majtën. Në fund është Gudiabi që e ndal duke larguar topin në fundore.

28’ Vila nga e majta tenton të hyjë në zonë, teksa pasimi i tij në qendër largohet nga prapavija e shkodranëve.

24’ Allmuça tenton nga jashtë zonës, por sfera devijohet jashtë.

23’ Harkim i Zabërgjës nga krahu i djathtë, sfera shkon në shtyllën e dytë te Vila i cili gjuan me kokë por çon sferën jashtë. (VIDEO)

19’ Tentativa e parë drejt portës në këtë ndeshje është e Dinamos, me Lorran i cili gjuan nga distanca duke çuar topin jashtë. (VIDEO)

8’ Skuadrat janë shumë të përqendruara në fazën mbrojtëse në këto minuta, duke mos lënë asnjë hapësirë të rrezikshme para portave.

4’ Karton i verdhë për Zabërgjën i cili ndal një kundërsulm të rrezikshëm të kuqebluve me faull.

3’ Zabërgja hyn në zonë në krahun e djathtë, por pasimi i tij në qendër ndalet nga Stojanoviç. (VIDEO)

1’ Nis dueli në ”Elbasan Arena”.

FORMACIONET ZYRTARE

DINAMO: Rexhepi, Mesa, Marku, Samake, Tusha, Denison, Gudiabi, Lorran, Allmuça, Zabërgja, Vila.
Trajner: Luixhi Di Biaxho

VLLAZNIA: Mëhidri, Pusi, Juriç, Stojanoviç, Sala, Alivoda, Boshnjaku, Krymi, Mala, Gruda, Balaj.
Trajner: Migen Memelli

PANORAMASPORT.AL

NDIQE LIVE "PANORAMA TV"

---