Në prag të dokumentarit që do të publikohet në nëntor në “Prime Video”, Jan Ulrish ka rrëfyer detaje interesante mbi jetën dhe karrierën e tij. Legjenda gjermane e çiklizmit, fitues i Turit të Francës 1997, ka folur gjithashtu edhe për akuzat për doping.

“Jam ndier shumë keq. Kam përdorur shumë kokainë dhe kam pirë uiski sikur të ishte ujë, duke i shkuar shumë pranë vdekjes”, rrëfen Ulrish në serialin kushtuar jetës së tij. Ish-kampioni gjerman i çiklizmit, e nis fort që nga “trailer”-i, në dokumentarin me katër episode, të titulluar “The Hunted”, që do të shfaqet në “Prime Video” pas disa muajsh. “Njëzet vjet më vonë ju i njihni gabimet që keni bërë”, thotë fituesi i Turit të Francës 1997 dhe i Vueltës së Spanjës 1999, gjithashtu medalist i artë edhe në Lojërat Olimpike “Sydney 2000”.

Në këtë serial gjithashtu ka hapësirë edhe për akuza për doping që e përfshijnë gjermanin, me pezullimin e tij përpara Turit të Francës 2006, për përfshirjen e Ulrish në “Operacion Puerto”, temë për të cilën 49-vjeçari thotë se “nuk kam tradhtuar askënd”.

RËNIA – Gjykata Ndërkombëtare e Arbitrazhit Sportiv e skualifikoi Ulrishin për dy vjet në vitin 2012 dhe i mohoi atij fitoren e përgjithshme në Turin e Zvicrës 2006, si dhe fitoret e arritura në Xhiron e Italisë 2006, në Turin e Gjermanisë 2005 dhe Turin e Zvicrës 2005 dhe 2006. Mes viteve 2010 dhe 2020 Ulrish kishte disa probleme me ligjin për shkak të abuzimit me alkoolin dhe drogën.

Miqtë, duke përfshirë ish-rivalin e madh Lans Armstrong, e ndihmuan atë në kohën e tij më të vështirë. Pas një rikthimi në fund të vitit 2021, Ulrish lëshoi deklarata tronditëse: “I shpëtova përsëri vdekjes”. Më pas, ish-çiklisti iu nënshtrua trajtimit dhe terapisë për të dalë nga varësia, dhe tani është kthyer të jetojë në Merdingen në BadenVurtemberg në Gjermani.

PANORAMASPORT.AL

NDIQE LIVE "PANORAMA TV"

---