Lushnja do të luajnë të dielën, ora 16:00, derbin e Myzeqesë me Apoloninë në stadiumin “Loni Papuçiu”. Nga transferta me Kastriotin, te transferta me Apoloninë, skuadra verdhejeshile luan një ndeshje tradicionale për llogari të javës së katërt të kampionatit.

Në lidhje me këtë takim, por pa harruar edhe atë që u ndodhi me krutanët, fillimisht trajneri Gugash Magani, për “Panorama Sport” u shpreh: “Ndeshjet derbi janë të luftuara dhe të paparashikueshme. Në Fier nuk do të përsëriten ato gabime që bëmë me Kastriotin, që pjesë e tyre jam edhe unë”. Pak kohë kanë patur në dispozicion, për të përgatitur ndeshjen, në një javë me dy takime, të mërkurë dhe të dielën. Duke folur për derbin, trajneri i skuadrës verdhjeshile tha se Lushnja duhet të jetë konkurruese. “Skuadra është e plotë. Kemi punuar, që lojtarët t’i shplodhim dhe të jenë në gjendje optimale”, deklaroi tekniku peqinas. Tashmë, lushnjarëve u duhet të bëjnë diçka më mirë, në Fier, pas humbjes me përmbysje kundër Kastriotit, në mesjavë.

“Në futboll mund të ndodh gjithçka. Shprehja shumë profesionale është të mos gëzohemi dhe të mos dorëzohemi pa konkurruar. Pra, do ta kemi në memorien tonë këtë shprehje, që të mos gabojmë. Shpresoj, që gjykimi të jetë korrekt dhe të mos ndikojë në rezultat, si me Kastriotin, ku gjyqtari anësor na penalizoi, duke anuluar një gol të rregullt”, deklaroi trajneri i Lushnjës Gugash Magani.

PRECEDENTËT- Vetëm një fitore për Lushnjën, në pesë përballjet e fundit në transfertë, në derbin me fierakët. I përket 22 shtatorit të vitit 2019, kur në fushën asnjanëse të Ballshit, verdhejeshilët fitonin 2-1, me dygolëshin e Mikel Cankës. Më pas, vijnë katër fitore radhazi për Apoloninë. E fundit më 22 nëntor 2023, 4-1, për fierakët.

PESË TRANSFERTAT E FUNDIT NË FIER

SEZONI 2019-2020 APOLONIA – LUSHNJA 1-2 (në Ballsh)

APOLONIA – LUSHNJA 3-1

SEZONI 2021-2022 APOLONIA – LUSHNJA 3-0

SEZONI 2022-2023 APOLONIA – LUSHNJA 3-0

SEZONI 2023-2024 APOLONIA – LUSHNJA 4-1

ALBAN ALUSHI- PANORAMASPORT.AL

NDIQE LIVE "PANORAMA TV"

---