Shumë largime nga Butrinti. U bënë më shumë se dy javë që grupi ka filluar të tkurret. Bëhet fjalë për lojtarë të cilët janë cilësuar si rikthime.

Mes tyre spikat Mario Mërkuri apo edhe Kristi Basha që është dalluar si shënues, por edhe ka mbajtur shiritin e kapitenit vjet tek U-19.

Veç tyre janë larguar edhe Albi Selimaj, Kristo Thodhori apo Hysi, emra që kanë impresionuar jo pak në radhët e skuadrave të moshave dhe janë cilësuar si elementë të perspektivës.

Duke mos pasur hapësirat e duhura në skuadrën e parë, kanë zgjedhur të ikin. Edhe pse të mirëpaguar ndoshta në Sarandë, domosdoshmëria për të marrë minuta i ka detyruar që t’i bashkohen Delvinës ose edhe ekipeve të tjera që militojnë në Kategorinë e Tretë.

Nëse këtyre futbollistëve u shtojmë edhe largimet e mbrojtësit Niko Paterni (italianit i përfundoi kontrata 6-mujore në Sarandë) apo dhe portierit Ariol Kaloshi (që ka komunikuar prej kohësh “divorcin” me klubin dhe në Cërrik luajti ndeshjen e fundit), atëherë situata bëhet edhe më serioze.

Kjo, pasi Butrinti duhet të mendojë seriozisht për merkaton. Faza e dytë është gjithmonë më e fortë se e para dhe duke parë objektivin mbijetesë që kanë sarandjotët, gjithçka bëhet edhe më e vështirë nëse nuk lëvizet shpejt. Sidomos, në fundin e garës, kur futbolli nuk luhet shumë në fushë, por me laps e letër, me llogari.

ERJON SALIU – PANORAMASPORT.AL

NDIQE LIVE "PANORAMA TV"

---