Testime pa fund, por te Dinamo nuk bindin stafin teknik
Dy javë përpara nisjes së kampionatit Dinamo ka ende disa nevoja në merkato. Koha është limituar dhe stafit teknik i duhen disa lojtarë në role kyçe, si për qendrën e mbrojtjes dhe të sulmit, por sërish klubi nuk po nxitohet.
Drejtuesit duket se po ecin me strategjinë për të mos pasur lojtarë sa për numër për sezonin e ri, por lojtarë që të jenë efikasë për skuadrën. Nëse nuk do të gjejnë ata elementë që kërkojnë, me shumë gjasa kryeqytetasit do t’u japin më shumë hapësira të rinjve që po stërviten aktualisht me Dinamon.
TESTIMET – Gjatë kësaj periudhe, si në kohën kur blutë u stërvitën në Arbanë, ashtu edhe tani në Itali, stafi teknik ka testuar lojtarë pa fund. Shumë lojtarë shqiptarë dhe të huaj kanë qenë për disa ditë nën urdhrat e trajnerit Dritan Mehmeti dhe më pas janë larguar, sepse nuk kanë bindur.
Më shumti kanë qenë të huaj ata që nuk kanë treguar se mund të vlejnë për Dinamon, për aq kohë sa janë stërvitur me të, apo edhe që kanë luajtur në ndeshjet e deritanishme stërvitore. Portugezi Nani, Gjikola (aktualisht i dëmtuar) dhe i riu Dibra janë “të mbijetuarit” e vetëm nga testet e stafit të Dinamos. Të enjten është programuar miqësorja e fundit në Itali, ku kryeqytetasit do të ndeshen me Livornon. Dhe pritet që në këtë ndeshje të provohet ndonjë lojtar tjetër, me shpresën se do të jetë i vlefshëm për “Nëndetësen”. Klubi kryeqytetas në fakt ka bërë disa afrime, por në të njëjtën kohë nga skuadra ka pasur edhe shumë largime, kështu që 3-4 përforcime janë të domosdoshme.
SULMI – Përveç qendrës së mbrojtjes, një tjetër emergjencë e Dinamos është maja e sulmit. Mandela mbeti në Tiranë për shkak dokumentesh, ndërsa në Itali janë parë disa alternativa, por askush nuk është identifikuar si sulmuesi që do të mbajë peshën kryesore të këtij reparti të rëndësishëm.
Klubi vazhdon kërkimet, por në këtë moment të merkatos është edhe më e vështirë për të gjetur sulmues me kualitet të lirë nga ana kontraktuale. Koha shtrëngon, megjithatë blutë po shohin me shumë durim për të bërë zgjedhjet e duhura.
PANORAMASPORT.AL
NDIQE LIVE "PANORAMA TV"
