Iliria ka zbritur të hënën në fushën e “Redi Maloku” për të nisur fazën përgatitore e vlefshme për sezonin e ri. Për të ngjitur ekipin në Kategorinë e Parë, drejtimi i ekipit i është besuar trajnerit të njohur Bledar Devolli i cili ka folur për “Panorama Sport”.

Cilat ishin arsyet që Bledar Devolli zgjodhi ekipin e Ilirisë këtë sezon?

Fillimisht dua të falënderoj presidentin Nazmi Selmani, që më besoi ekipin. Unë, bashkë me të dhe tre djemtë e tij do të bëjmë më të mirën për ekipin. Kemi një program bindës dhe shpresojmë që me punë të gjithë së bashku ta çojmë përpara ekipin.

Shihni ndonjë pengesë për arritjen e objektivit?

E vetmja pengesë, që unë vë re është kufizimi që FSHF ka vendosur në lidhje me numrin e lojtarëve të afruar nga jashtë qarkut, pasi numri 5 nuk të lë hapësira për të afruar sa më shumë djem të rinj që duan të luajnë futboll. Shpresojmë që të hiqet ky rregull pastaj kryesore për ne është plotësimi i grupit, ta bëjmë atë sa më konkurrues. Konkurrenca forcon dëshirën e lojtarëve për të dhënë gjithçka nga vetja. Dëshira jonë është që gjërat t’i zgjidhim sa më shpejt.

A ju bind ky grup lojtarësh për objektivin e vetëm që ka Iliria, ngjitja në të Parën?

E cilësova dhe më lart. Ne kërkojmë heqjen e këtij rregulli, në mënyrë që të mos ketë kufizime dhe futbollistët e rinj që dalin nga akademitë të luajnë me kë ekip kanë dëshirë. Kjo do të jetë një mundësi e mirë për ta, për t’u rritur në futboll.

Ç’mund të na thoni në lidhje me merkaton?

Le të presim sepse ka kohë. E para, të shohim grupin. E dyta, të hiqet ky ligji dhe kjo na e hap rrugën për të ndërtuar një ekip ashtu si e dëshirojmë ne të gjithë, presidenti unë dhe djemtë e tij. Gjithçka mbetet e hapur.

Ne sapo kemi nisur punën dhe do të shikojmë njëherë kontigjentin që kemi në dispozicion, për ta plotësuar më pas ekipin sipas roleve. Këtë do ta përcaktojmë më mirë në ndeshjet miqësore që do të zhvillojmë. Merkaton e kemi ende të hapur.

ABDULLA DUSHKU – PANORAMASPORT.AL

NDIQE LIVE "PANORAMA TV"

---