PESHËNGRITJE/ Kofsha shkëlqen në Spanjë, bronz në Botërorin e të rinjve
Ertjan Kofsha ka shënuar një tjetër rezultat të shkëlqyer në arenën ndërkombëtare të peshëngritjes për moshat.
Ertjan Kofsha, gjatë garës së djeshme në Spanjë
19-vjeçari nga Shtërmeni fitoi dje medalje bronzi në Kampionatin Botëror për të rinj që po mbahet në Leon të Spanjës. Talenti i shtangës shqiptare bëri paraqitje shumë të mirë në këtë aktivitet, duke spikatur sidomos në stilin e shkëputjes, aty ku u rendit në vendin e tretë, ndërsa shtytjen dhe dygarëshin e mbylli në vend të pestë. Rezultate premtuese këto në një kompeticion me rivalitet të lartë, ku garonin talentet e shtangës botërore. Kofsha ishte përfaqësuesi i vetëm i Shqipërisë në këtë kompeticion, ndërsa mbetet për t’u theksuar se peshëngritja shqiptare po kalon momentin më të keq me të rriturit, ku për herë të parë në histori nuk u përfaqësua në Lojërat Olimpike.
GARA – Ertjan Kofsha u ngjit pasditen e djeshme në pedanë në Baterinë A për peshat 96 kg. Peshëngritësi i Shqipërisë e filloi stilin e shkëputjes, duke ngritur me sukses 156 në provën e parë. Kofsha i shtoi edhe 5 kg kësaj peshe në tentativën e dytë, duke realizuar sërish me sukses edhe peshën 161 kg. Më pas provoi me 163 kg, pa mundur ta kalojë. Kështu me rezultatin 161 kg, peshëngritësi kuqezi arrin vendin e tretë, duke varur në qafë medaljen e bronzit në shkëputje. Më tej ishte radha për stilin e shtytjes. Kofsha e nisi mbarë duke ngritur 191 kg, por më pas dështoi me 195 dhe 197 kg, për ta mbyllur këtë stil në vendin e pestë. Ndërkohë me 352 kg në total, shtangisti shtërmenas u klasifikua në vendin e pestë edhe në dygarësh. Në kategorinë 96 kg, japonezi Masashi Nishikaua u shpall kampion bote për të rinj në shkëputje me 171 kg dhe në dygarësh me 366 kg. Ndërsa në shtytje medaljen e artë e fitoi kolumbiani Sergio Munoz Rios me 198 kg.
SHPËRBLIMI – Me paraqitjen e tij në botërorin e të rinjve, Ertjan Kofsha është futur edhe në zonën e shpërblimeve financiare që parashikon legjislacioni shqiptar. Peshëngritësi kuqezi do të përfitojë gjithsej 15.9 milionë lekë të vjetër nga rezultatet e shënuara dje në Spanjë. 12 milionë për medaljen e bronzit në shkëputje, 3 milionë për vendin e pestë në shtytje dhe 900 mijë lekë të vjetër për vendin e pestë në dygarësh. Gjithashtu shpërblim do të ketë edhe për trajnerin Leonard Toska, i cili sipas ligjit merr 40% të shumës së sportistit, pra 6 milionë e 360 mijë lekë të vjetër. Kështu sportisti dhe trajneri marrin shpërblimin e merituar për punën e jashtëzakonshme që çdo ditë bëjnë në palestrën e Shtërmenit. Tashmë në shënjestër të Kofshës do të jetë Europiani i të rinjve, event që do të mbahet pas një muaj në Poloni.
MARIGLEN MIRAKA-PANORAMASPORT.AL
NDIQE LIVE "PANORAMA TV"
