Pedri Gonzalez (21 vjeç) ndihet shumë mirë në këtë fillim sezoni. Dëmtimi i shkaktuar nga ndërhyrja e Toni Krosit në Europian nuk e pengoi atë të arrijë në kohë për fillimin e sezonit të ri në La Liga në “Mestalla”.

Ai ka besimin e plotë të trajnerit Hansi Flik dhe lojtari nga ishujt Kanarie nuk ka ngurruar ta falënderojë trajnerin për rolin që i ka caktuar në skuadër. Pedri është pak si drejtor i orkestrës së Barçës. “Mbi të gjitha është shumë i afërt, është një trajner që i pëlqen të flasë me lojtarët. Ai përveç se është serioz, bën edhe shaka, nuk është aq serioz sa duket gjatë gjithë kohës. Na ndihmon shumë ne të rinjve. Por, është e qartë se kur gjërat duhet të merren seriozisht, gjithçka merret seriozisht”, deklaroi Pedri.

Ndërkaq, Pedri ka treguar dhe sekretin e Barcelonës së Hansi Flikut. “Jemi shumë mirë fizikisht, sepse po punojmë shumë më tepër se më parë. Mendoj se trajnerët fizikë që kanë ardhur po na bëjnë shumë mirë. Kemi punuar shumë dhe kjo duket në lojë. Skuadra nuk bie pas minutës së 70-të apo të 80- të, por ruan nivelin e saj fizik”, tha Pedri.

PANORAMASPORT.AL

NDIQE LIVE "PANORAMA TV"

---