Edhe pse Barcelona nuk ia doli të shkonte më shumë sesa barazimi me shifrat 2-2 në transfertën e Majorkës, ata mund të mburren me një detaj tjetër, i cili ka të bëjë me talentin Firmin Lopez. Saktësisht talenti spanjoll me tipare mesfushori është i 10-ti në radhët e katalanasve që shënon.

Kampionët e La Ligës janë inkuadruar në të gjithë turnetë përgjatë ciklit 2023-2024 në 8 sfida e ku numri i golave në total përkon me kuotën e 23 finalizimeve, mesatarisht 2.8 gola për ndeshje. Robert Levandovski mban petkun e “goleadorit” me 6 realizime, duke lënë në vendin e dytë anësorin portugez Zhoao Feliks, i cili ka bërë mjaft mirë që kur zbarkoi në “Spotify Camp Nou”, 3 konkretizime në harkun e 5 prezencave.

Shkallën më të ulët të këtij “podiumi” e mban Ferran Torres, me po të njëjtën sasi golash, ndonëse me numër më të lartë sfidash. Më tej vijojnë Gavi, Rafinja dhe Kanselo me nga 2 rrjeta. Në listë nuk kishte se si të mungonte “magjistari” holandez Frenki de Jong, 1 gol, ashtu si “homologu” Pedri.

Reparti defensiv prezantohet me Zhyl Kundenë dhe Zhoao Kanselon në prapavijë, saktësisht 1 finalizim. Për t’i vënë kapak numrit të 10 lojtarëve që kanë shijuar golin në periudhën aktuale ka menduar Firmin Lopez, konkretisht atë ndaj Majorkës, në vigjilje të javës së 7-të në La Liga.

PANORAMASPORT.AL

NDIQE LIVE "PANORAMA TV"

---