Kuçovarët duket se do të kenë pretendime serioze në sezonin e ri në Kategorinë e Dytë. Përgatitjet kanë filluar me ritëm të lartë dhe përforcime të shumta.

Klubi i ka kushtuar vëmendje edhe stadiumit “Bashkim Sulejmani”. Gjithçka duket në rregull brenda fushës së lojës dhe jashtë saj. Fusha me bar natyral është në gjendje perfekte, falë punës së mirë të punonjësve. Në rregull duket edhe tribuna qendrore, aty ku janë dhomat e zhveshjesh. A. ÇEPANI

BUTRINTI

Butrinti godet sërish në merkato. Sarandjotët kanë prezantuar tre futbollistë, Sebastian Llaka, i cili ka dalë nga akademia e Napolit në Itali, Andri Çelo që sezonin e kaluar ishte pjesë e Luftëtarit. I treti është Florian Dauti, i cili vjen nga Greqia, ku vjet ishte pjesë e Kalithea U-21. Përgatitjet për sezonin e ri futbollistik vijojnë intensivisht në Sarandë, Butrinti kishte planifikuar që të merrte pjesë në një turne në Greqi, por që e anuluan. FATOS LAMAJ

TURBINA

Turbina vijon me intensitet të lartë përgatitjet dhe ekipi është drejt kompletimit. Të mërkurën, cërrikasit zhvilluan testin e radhës në Librazhd, por takimi u ndërpre në minutën e 60-të, kur rezultati ishte 2-2. Turbina ka konfirmuar qëndrimin e dy lojtarët e sezonit të kaluar, mbrojtësi Marin Zëre dhe mesfushori Ergi Brahja. Në Cërrik presin edhe ardhjen e dy sulmuesve cilësorë. Klubi po bisedon me ta, por emrat do të bëhen publik kur të ketë akord. MARIGLEN MIRAKA 

GRAMSHI

Futbollistët gramshiak gëzojnë formë të mirë sportive në këtë fazë përgatitore. Gramshi ka konfirmuar disa lojtarë të ardhur në këtë merkato. Bëhet fjalë për Xhelilin, Malajn, Çelën, Dhimën, Tartarin dhe Muzhaqin. Në ditët në vijim pritet të tjerë lojtarë. Të shtunën, Gramshi do të zhvillojë një tjetër miqësore, ku do të udhëtojë drejtë Librazhdit për t’u ndeshur me Sopotin. Testet janë të domosdoshme për stafin për kompletimin e ekipit përpara startit të kampionatit. MARIGLEN MIRAKA

PANORAMASPORT.AL

NDIQE LIVE "PANORAMA TV"

---