Artim Pollozhani drejt largimit nga Flamurtari. I emëruar pak më shumë se dy muaj më parë si drejtor sportiv i klubit, shqiptari nga Maqedonia e Veriut pritet të ketë si destinacion Ballkanin në Kosovë, duke marrë detyrën e trajnerit të lënë bosh pas largimit të Ilir Dajës.

Një fakt të tillë e pranon edhe administratori i Flamurtarit, Sinan Idrizi, i cili deklaron se nuk ka ndërmend ta pengojë për shkak të ofertës ekonomike “të majme” që i ka ardhur nga Kosova. “Është e vërtetë që ka pasur disa bisedime. Pollozhani momentalisht është në Vlorë me mua. Ka pasur një ofertë miqësore nga këta. Pollozhani ka qenë korrekt, ka ardhur që të bisedojë me ne pikë së pari. Domethënë ka diçka. Ai vetë nuk pranon as një gjë. Problemi do të ishte nëse te ne nuk ka problem, mund të shkojë. Nëse ne i themi se mund të na krijojë probleme është një histori që…Ata i kanë bërë dje (pardje) një ofertë zyrtare.

Pollozhani u ka thënë shkurt që është pjesë e Flamurtarit nuk lëviz nga Vlora. Ajo ofertë ekonomike është e mirë dhe unë mendoj se Pollozhani duhet të bëjë më të mirën për veten e tij. Te Flamurtari ka punuar në mënyrë serioze dhe shumë korrekte. Ne jemi të mirëkuptueshëm. Kur është një ofertë ekonomike e tipit të tillë që është disa herë më e kënaqshme, atëherë nuk kemi pse e pengojmë. Unë e kam aq shumë mik sa që i them shiko kushtin tënd ekonomik.

Do iki nuk do iki është problem tjetër. Ai burrërisht thotë nuk shkojë. Por kjo është një ofertë ekonomike. Ju kujtohet Albi Alla para 6 vjetëve, pati një ofertë shumë të mirë dhe unë e lashë të lirë, nuk i mora asnjë lekë nga kartoni. Unë nuk pengoj asnjë njeri. Kur ka një ofertë ekonomike shumë të lartë nuk e pengoj, kushdo qoftë ai. Nuk ka pengesë”, shprehet Idrizi. Kujtojmë që për Ballkanin në lojë është edhe ish-trajneri i Partizanit dhe Tiranës, Orges Shehi, i cili në këtë moment është pa ekip.

ERMAL SIKA- PANORAMASPORT.AL

NDIQE LIVE "PANORAMA TV"

---