Presidenti i Barcelonës, Joan Laporta, ka dalë në një konferencë të gjatë për shtyp, ku ka bërë një bilanc të merkatos së verës. Në fakt tema duhej të ishte merkato. Por Laporta ka folur për gjithçka, që nga marrëdhëniet me Realin e Madridit, çështjen e Super Ligës Europiane, largimi i Gyndoan, apo ish-trajneri Ksavi Hernandez.SKUADRA – “Jam i kënaqur, skuadra është përmirësuar. Prioriteti për mua si president ishte të sillja Dani Olmon. Jam i kënaqur që ai është me ne dhe gjithashtu i kënaqur me atë çfarë po bën. Pastaj, ajo që ka bërë Flik është për t’u admiruar, veçanërisht përkushtimi i tij te ‘La Masia’. Nuk kërkojmë eufori të kotë, por nuk mund të proklamojmë katastrofa siç po ndodh”.

STADIUMI – “Gjithçka po ecën me ritmin e planifikuar. Nuk caktojmë datë, mund të ndodhë herët a vonë. Jemi të bindur se ky është realiteti, vetëm duhet të vizitojmë punimet, pavarësisht pengesave. Jemi shumë optimistë se gjithçka”.

“FAIR PLAY” FINANCIAR – “Të gjitha klubet kanë vështirësi, por ne do të arrijmë edhe te rregulli 1-1. Por afatet sportive nuk përkojnë me ato financiare. Mund të ishim brenda këtij rregulli që mund të na lejonte ndonjë afrim më shumë, por jemi të kënaqur dhe kështu. Parë vështirësitë e shumë klubeve, jo vetëm Barçës, do të ishte mirë nëse La Liga të tregohej më fleksibël, ndonëse e shoh mirë kontrollin që po bën”.

NIKO UILLIAMS – “Nuk dua të flas për lojtarë që nuk janë tanët, qoftë dhe për respekt për Bilbaon”.

OBJEKTIVAT, TROFETË – “Bazohem te trajneri, lojtarët, trajnerët, te atmosfera në dhomat e zhveshjes… Flik e tha, ka një atmosferë familjare, përkushtimi… janë afruar lojtarë me vlera si Bernal, Kasado… Gerard Martin, Serxhi Domingez. Shpresojmë për Frenki de Jong pas pushimit… dhe më vonë, Ansu Fati, Gavi e me radhë”.

REGJISTRIMI I OLMOS – “Ne jemi brenda limiteve që na garanton rregulli 1-1, të paktën deri në momentin kur Kristensen do të kthehet nga dëmtimi. Kemi shfrytëzuar këtë situatë, në bazë të rregullave të vendosura nga Liga. Ata kanë sjellë mjekun e tyre për të konfirmuar çdo veprim tonin”.

GYNDOAN – “Ai është një lojtar i madh dhe një person i shkëlqyer. Por pas një takimi me Flik dhe duke vlerësuar situatën e skuadrës, ai vendosi të largohej. Ai nuk ka qenë vetëm një vendim sportiv, por pasojat ekonomike kanë qenë të mira për ne. Është një vendim sportiv nga Barça dhe Gyndoan. Ai erdhi pa një çmim transferimi dhe ishte e drejtë që nëse do të donte të shkonte te Siti, nuk do të kishte asnjë pagesë. Ka pasur ndikim në llogaritë tona, por arsyeja ka qenë një vendim sportiv nga lojtari”.

PËRFORCIMET – “Ne nuk po flasim për lojtarë që nuk janë tanët. Ne po flasim për një operacion të madh dhe e kemi kryer me sukses atë. Deko na tha se ai ishte lojtari që kishim nevojë. Ne kemi afruar në fakt dy lojtarë. Mos harroni Pau Viktor që ka treguar aftësi për të shënuar. Ne mendojmë se kemi një ekip kompakt në mbrojtje, mesfusha është e fuqishme, kur të rikuperojmë edhe të lënduarit dhe në sulm kemi: Levandovskin, Ansu Fati, Ferran Torres, Rafinja… Kemi një skuadër shumë të mirë ne kemi një trajner që e di se për çfarë po luajmë”.

HANSI FLIK – “Ne kërkojmë punë, profesionalizëm, të kemi një trajner që jeton çdo ditë me intensitet, të kemi një trajner që na ofron futbollin që na pëlqen dhe jemi dakord për çdo gjë. Ne po vendosim objektivat që i kemi vënë vetes që të realizohen. Ai është një njeri që nuk kërkon justifikime dhe është kërkues.”

DEKO – “Kam pasur frikë për shëndetin e tij. Stresi ka qenë i jashtëzakonshëm për të. Jam shumë rehat me të dhe po të mos ishte kështu do t’i thoshim njëri-tjetrit mirupafshim. Është një vit në të cilin do të shihet puna që ka bërë”.

SUPER LIGA EUROPIANE – “Është ende në gjendjen aktuale. Në këtë kuptim po punohet që të nisë. Fakti që ajo ekziston e bën UEFAn të lëvizë. 500 milionë euro më shumë shpërndahen mes klubeve dhe kjo tregon se Super Liga ka ndikuar. Edhe pse ka më shumë ndeshje. Shifrat e Super Ligës janë shumë tërheqëse. Të gjithë ata që dëshirojnë të na bashkohen janë të mirëpritur. Do të shohim se si do të shkojë me formatin e ri. Personalisht jam i kënaqur, sepse do të ketë shumë ndeshje tërheqëse”.

REZULTATET POZITIVE – “Kanë kaluar shtatë vjet që nuk kemi pasur një nisje të tillë. Por gjërat kanë shkuar mire edhe në çështjet financiare. Nuk mund të flas për gjëra specifike për kompanitë me kontratën e re të sponsorizimit. Ka një marrëveshje konfidencialiteti. Jemi të kënaqur me mënyrën se si po zhvillohet, do të jetë më e mira në futboll. Kontrata me ‘Nike’ nuk ndikon në llogaritë për sezonin 2023- 2024. Do ta bëja bilancin në sezonin 2024-2025″.

PËRPLASJA ME REALIN – “Marrëdhëniet me Realin janë të këqija, ata ndërhynë në rastin ‘Negreira’ dhe kjo është e papranueshme”.

MERKATO E DIMRIT – “Ne do të arrijmë shpejt në rregullin 1-1. Kjo na e bën më të lehtë regjistrimin e lojtarëve. Për momentin jemi të kënaqur me situatën që kemi. Sigurisht që ekipi po përgjigjet, por nëse ne arrijmë rregullin 1-1, ne do të jemi në gjendje të nënshkruajmë me lojtarë të tjerë siç e kemi parashikuar”.

KSAVI HERNANDEZ – “E vlerësoj shumë, por menduam se duhej të jepnim një shtysë të re. Në këtë kuptim kam qenë gjithmonë mirënjohës. Ishte në një moment shumë të vështirë, fituam një Ligë. Mendova se duhet të mbanim një marrëdhënie miqësore, por mendoja se Flik kishte kushtet për të forcuar ekipin”.

REALI I MADRIDIT – “Unë fokusohem te Barça. Jemi mirë, kemi filluar siç është planifikuar. 7-0 kundër Valladolidit ishte një futboll cilësor. Lojtarë që po rikuperojnë nivelin e tyre. Jemi të sigurt se do të shkojë mirë”.

LEVANDOVSKI – “E shoh atë më të motivuar se asnjëherë. Ai kishte nevojë për një nxitje të re. Ai është fizikisht mirë. Ai është i përkushtuar. Ai ofroi kontratën e tij kur pa se kishim probleme me lojën e ndershme. Ai është i përkushtuar ndaj klubit dhe ekipit dhe besoj se do të jetë viti i tij më i mirë”.

LEDJO SEFERKOLLI-PANORAMASPORT.AL

NDIQE LIVE "PANORAMA TV"

---