Në sallën qendrore të Pallatit të kul turës “Kavaljon”, dje ish-futbollistë, trajnerë e tifozë kanë kremtuar 98-vjetorin e themelimit të KS Besa. Në të morën pjesë kryetari i Bashkisë Kavajë, Fisnik Qosja, presidenti Nexhat Bizhdili, i deleguari i FSHF-së anëtar i komitetit ekzekutiv Sulejman Demollari, qindra adhurues të verdhezinjtë, si edhe të ftuar të tjerë.

Himni i flamurit dhe një minidokumentar me historikun e klubit hapën këtë ceremoni. Kjo ditëlindje e gjen Besën në ditët e saj më të errëta. Kanë 10 vite rresht që i mungojnë Superiores dhe këtë sezon e kanë nisur si mos më keq.

Në fjalën e tij përshëndetëse, Nexhat Bizhdili ngriti shqetësimin e mungesës së stadiumit dhe i kërkoi kryebashkiakut vetëm një gjë: rindërtimin e stadiumit. Prej vitesh ai impiant ka degraduar dhe është zaptuar nga delet e dhitë. Gjë ka detyruar ekipin të bredhë nga njëri qytet në tjetrin.

KRYEBASHKIAKU

Me interes të madh u prit fjala e kryetarit të Bashkisë Kavajë, i cili dha lajmin e madh. Lajmin që prej vitesh e presin mijëra kavajas, ndonëse u premtua në disa fushata elektorale. Fisnik Qosja garantoi se në muajin nëntor do të nisë shembja dhe 100-vjetori do ta gjejë stadiumin gati.

“Gjatë fushatës kurrë nuk kam premtuar ato që nuk kisha garanci se do të realizoheshin. Kështu që nuk munda të premtoj edhe ndërtimin e stadiumit të Kavajës. Por si një kavajas, çdo ditë, çdo sekondë, çdo minutë, kam menduar edhe për futbollin. Për këtë arsye, nga dita e parë që mora detyrën kam nisur tratativat për të gjetur donatorë e për t’ua plotësuar këtë dëshirë bashkëqytetarëve të mi. Sot mund t’u them se në nëntor do të nisë shembja e stadiumit ekzistues, që do t’i hapë udhë ndërtimit të stadiumit të ri. Uroj e besoj se 100-vjetori i klubit do ta gjejë qytetin me stadium të ri”, tha numri një i bashkisë.

PROJEKTI

Si për të përforcuar këtë premtim, në monitor u shfaq edhe projekti i stadiumit të ri. Një impiant që do të ketë kapacitet 5 mijë vende, luksoz dhe nuk mungonin as qindra vende parkimi.

Investimi do të jetë në bashkëpunim me bashkinë dhe FSHF-në, por edhe donacione të huaja. Kjo ceremoni u drejtua nga kolegu Dëfrim Methasani dhe u shoqërua me një tjetër moment prekës.

Dy ikonat e Besës, Vullnet Dedej, ish-mesfushor, trajner i Besës, por, mbi të gjitha, themelues i klasave sportive, fidanishte nga të cilat lindën futbollistët e mëdhenj e që sot fatkeqësisht nuk jetojnë më, si dhe Bajram Hushi një ish-mbrojtës brilant i Besës, mësues i edukimit fizik, u nderuan me titullin “Nderi i Qytetit” pas vdekjes.

Shumë emocione u përjetuan në sallë, teksa në monitor u shfaq “Mjeshtri i madh” Muharrem Karriqi që jeton në Itali. Ai është parë teksa lotonte për stadiumin “Besa”.

Ky ceremonial vijoi me promocionin e vëllimit të dytë të ciklit “Yjet e futbollit kavajas” të gazetarit Fatmir Efica. Ky libër sjell para futbolldashësve kavajas dhe jo vetëm, disa nga ikonat e futbollit verdhezi. Ceremonia u mbyll me një kokteil.

FERIZ FERIZAJ – PANORAMASPORT.AL

NDIQE LIVE "PANORAMA TV"

---