Herri Kejn është gati për sezonin e ri të Bajernit të Mynihut. Me një trajner të ri dhe një vizion të qartë, ai dëshiron ta çojë klubin drejt sukseseve të reja. Dëshira për të fituar është e madhe te rekordmenët e Gjermanisë pas një sezoni pa trofe.

Ylli anglez vendos menjëherë objektivat e tij në një intervistë për “Sport Bild”: “Dua të vazhdoj të shënoj gola dhe të ndihmoj skuadrën. Por një gjë është e qartë: qëllimi kryesor është fitimi i titujve! Me trajnerin e ri Vinsent Kompani, klubi ka sjellë një fytyrë të re, të freskët në bord”.

ENTUZIAST – Kapiteni i Anglisë është i emocionuar për punën me trajnerin e ri belg: “Jam shumë i emocionuar të shoh se si do të jetë me trajnerin e ri mënyra se si luajmë”. Përshtypjet e para janë premtuese: “Do të kemi shumë topin në kontroll dhe do të krijojmë shumë shanse. Kjo është mënyra perfektë për të luajtur për mua. Shpresoj të kem shumë shanse dhe të shfrytëzoj disa prej tyre…” 31-vjeçari, i cili këtë verë kaloi një tjetër zhgënjim të madh në karrierë duke humbur në finalen e dytë radhazi të Kampionatit Evropian, ishte jashtë gjendjes së tij më të mirë fizike, por ende vështirë se mund të identifikohet si fajtori. Me 44 gola në 45 ndeshje zyrtare, në raundet eliminatore të Ligës së Kampioneve, ai ka dëshmuar aftësinë e tij për të shënuar. Megjithatë, nën drejtimin e Kompanisë ai pritet të bëjë më shumë sesa thjesht të shënojë gola. “Po, padyshim që do të jetë më shumë punë. Vura re që në dhjetë minutat e para kundër Totenhemit ishin dhjetë minuta shumë të vështira”, tha 31-vjeçari.

Por Kejn nuk dekurajohet nga kjo sfidë. “Duhet të kuptosh idenë e trajnerit dhe ta zbatosh atë në lojë. E dua këtë intensitet. Më pëlqen ta fitoj topin sa më shpejt që të jetë e mundur. Kjo është përgatitja tani, të kuptosh idetë e trajnerit dhe t’i zbatosh ato në ndeshje”. A është gati Bajerni ta bëjë këtë në një ndeshje zyrtare? E ardhmja do të tregojë. Në çdo rast, Kejn tani është ambientuar plotësisht në mjedisin e tij të ri sportiv. Ndërsa kishte ende shumë punë organizative për të bërë në sezonin e parë, tani sulmuesi mund të përqendrohet plotësisht te futbolli: “Sezoni i parë ishte një sezon i mrekullueshëm për mua, u mësova me ligën e re, vendin e ri. Por në futboll ka të bëjë gjithmonë me përvojën dhe njohuritë e duhura”.

ANDROKLI DRALO-PANORAMASPORT.AL

NDIQE LIVE "PANORAMA TV"

---