Partizani ka marrë gjithçka me qetësinë e nevojshme gjatë këtyre ditëve. Teksa presin rivalët të luajnë në mesjavë, të kuqtë vijojnë përgatitjet për ndeshjen ndaj Skënderbeut ditën e diel në Korçë, e vlefshme për javën e shtatë.

Trajneri Zekiç është përpjekur gjithë kohës të përmirësojë aspektin taktik, përveç gjendjes fizike. Kroati kërkon një skuadër pa luhatje gjatë lojës dhe përqendrim nga minuta e parë deri tek e fundit. Përpos kësaj, fokus të veçantë kanë edhe lojtarët me probleme fizike. Lajmi i mirë është se të gjithë janë rikthyer të stërviten pjesërisht me skuadrën. Gjendja e Hadrojit është përmirësuar, por ende mbetet në rrezik për ndeshjen me Skënderbeun.

Po mendohet që pukjani të qëndrojë pushim edhe në këtë sfidë, që të mos rrezikojë një tjetër lëndim. Edhe Mensah po rritet fizikisht dhe mund të marrë disa minuta ndaj ish-ekipit të tij. Ndërkohë, Sembene është më mbrapa se të tjerët.

Ai ende e ndien krahun të dobët dhe stafi mjekësor kërkon t’i japë kohën e nevojshme. Qirko gjithashtu po stërvitet normalisht, por ende nuk e ndjen veten të sigurt në momentet e hedhjeve dhe zgjatjeve. Mba e Mehmeti i kanë kaluar tashmë dëmtimet.

FORMACIONI – Sa i përket 11- shes që mund të luajë ndaj Skënderbeut, kthimi i Da Silvës dhe forma e mirë e Magetit dhe Bintsukës i kanë “turbulluar” ujërat. Në portë pritet sërish Hoxha, që ka treguar se është një siguri më vete mes shtyllave.

Nga ana tjetër, mbrojtja nuk pritet të ndryshojë, me Zekollin, që ka arritur ta superojë anën e djathtë dhe e ka zëvendësuar si duhet Hadrojn.

Në mesfushë, Mehmeti ka humbur terren në qendër ndaj Magetit dhe pritet që edhe ndaj Skënderbeut “balotazhin” ta fitojë senegalezi. Murataj dhe Rrapaj priten titullarë. Në sulm, nëse rikthehet Mba, “i sakrifikuari” mund të jetë Cara, teksa forma e mirë ndaj Dinamos pritet ta katapultojë Da Silvën në formacion.

PANORAMASPORT.AL

NDIQE LIVE "PANORAMA TV"

---