Sot starton faza e “play-off”-it të Kategorisë së Parë me dy ndeshje tepër interesante dhe emocionuese.

Flamurtari i Eqerem Memushit do të pres Korabin në Vlorë. Vlonjatët e mbyllën sezonin të tretit në renditje me 58 pikë të grumbulluara në 33 takime. Një sezon relativisht i mirë për ta, ku përfunduan direkt pas Elbasanit dhe Bylist, që u ngjitën matematikisht në Superiore. Vlonjatët duan rikthimin në elitë pas kaq shumë sezonesh në Kategorinë e Parë.

Nga ana tjetër është Korabi. Skuadra nga Peshkopia e mbylli sezonin në vendin e gjashtë, me 44 pikë të grumbulluara pas 33 ndeshjesh. Edhe këta duan të rikthehen pas një kohe të gjatë në Kategorinë Superiore, por në fillim duhet të kalojnë Flamurtarin e karikuar për triumf.

Ndeshja tjetër do të jetë ajo midis Vorës dhe Apolonisë. Takimi do të zhvillohet te stadium i Vorës. Vendasit e mbyllën sezonin në vendin e katërt me 50 pikë të grumbulluara në 33 përballje. Nga ana tjetër fierakët e mbyllën një pozicion më poshtë, në të pestin. Ata grumbulluan 46 pikë në 33 takime, duke siguruar një vend në “play-off”.

Në bazë të rregullores, sot Flamurtarit dhe Vorës u mjafton edhe barazimi për të kaluar në finalen “play off”, pasi janë të avantazhuar prej renditjes më të mirë në klasifikimin përfundimtar të Kategorisë së Parë.

Takimet do të zhvillohen në orën 15:00, dhe mund t’i shikoni golat, po ashtu edhe rastet e shumta në kohë reale te “Panorama Sport”.

 

SONI SALIHI-PANORAMASPORT.AL

NDIQE LIVE "PANORAMA TV"

---