Elbasani luan sot në Peshkopi për të ruajtur kreun. Një përballje e vështirë për të besuarit e Nevil Dedes, që vijnë në këtë duel pas katër fitoresh radhazi. Në intervistën e dhënë për “Panorama Sport”, trajneri shpreh respektin maksimal për kundërshtarin, ndërsa merak te të tijtë ka vetëm mungesën e përqendrimit. Në transfertë verdheblutë janë cinikë dhe nuk shënojnë më shumë se një gol, por Nevil Dedes i mjafton edhe vetëm një gjysmë goli për të marrë tri pikët.

Luani në Peshkopi me Korabin, si e shihni këtë ndeshje?

Unë e shoh si të gjithë ndeshjet e tjera. Respekt maksimal për të gjithë kundërshtaret, por mbi të gjithë për vetën tonë dhe tifozët.

Vini pas katër fitoresh radhazi, sa ndikon kjo gjë në moralin e ekipit?

E rëndësishme është që skuadra të vazhdojë të interpretojë dhe duhet të eliminojmë mungesën e përqendrimit në disa momente ku edhe kemi pësuar disa gola të evitueshëm.

Përveç përqendrimit në disa raste që përmendët ju, mendoni se ekipi po ju përgjigjet plotësisht?

E rëndësishme është që grupi ynë të bashkohet i gjithi. Na duhet edhe pak kohë që të jenë bashkë me njëri-tjetrin. Gjithnjë kemi pasur mungesa lojtarësh, por në fund fare forca e grupit, personaliteti i këtyre djemve dhe harmonia që kanë brenda jep garanci që ne mund ta zëvendësojnë dhe përballojnë çdo mungesë në çdo ndeshje.

Në transferta nuk shënoni më shumë se një gol, pse vjen kjo?

Është vetë specifika e kësaj kategorie. Realisht ka pak rezultate jashtë fushe, edhe pse nuk mungojnë as rezultatet e thella. Për mua është e rëndësishme sikur edhe gjysmë me zero të fitojmë. Unë jam i kënaqur me djersën dhe punën që bëjnë djemtë.

Më shumë ju pëlqen të fitoni 3 me 2 apo 1 me 0?

Dua vetëm të fitoj. Mjafton një gol më shumë.

VLADIMIR MEMA – PANORAMASPORT.AL

NDIQE LIVE "PANORAMA TV"

---