Roan Human vazhdon të jetë një nga futbollistët më të vlerësuar në organikën e Partizanit dhe paraqitjet e tij gjatë sezonit të fundit nuk kanë kaluar pa u vënë re edhe jashtë Shqipërisë. Mesfushori është përfshirë së fundmi në radarët e një klubi ukrainas, i cili ka shfaqur interes për të siguruar shërbimet e tij në këtë merkato vere.

Megjithatë, pavarësisht interesimit konkret, situata nuk ka avancuar drejt një marrëveshjeje. Arsyeja nuk lidhet me cilësitë e futbollistit apo me mungesën e dëshirës së palëve për të diskutuar, por me mënyrën se si po operojnë disa klube në Ukrainë në periudhën aktuale.

OFERTA E VEÇANTË – Sipas informacioneve, oferta e paraqitur nuk është ndërtuar sipas formave tradicionale të transferimeve, por përmes një sistemi që parashikon pagesa në bitcoin dhe jo në para në mënyrën klasike që përdoret zakonisht në tregun e futbollit. Ky detaj ka bërë që drejtuesit e Partizanit të tregohen të kujdesshëm dhe të mos nxitojnë në marrjen e një vendimi.

Klubi po analizon me vëmendje çdo aspekt të mundshëm të një operacioni të tillë, ndërsa për momentin nuk ka asnjë zhvillim që të çojë drejt largimit të mesfushorit. Në këto kushte, Roan Human vijon të mbetet një futbollist i Partizanit dhe pjesë e planeve të klubit për sezonin e ardhshëm. Në kampin e kuq ekziston bindja se lojtari mund të japë ende shumë me fanellën e kryeqytetasve dhe se prania e tij në skuadër përbën një vlerë të rëndësishme.

LAJMIN E PLOTË MUND TA LEXONI NË VERSIONIN PRINT TË GAZETËS “PANORAMA SPORT”

PANORAMASPORT.AL

 

---